Россия туристлары бәлага таруларына үзләре гаепле

Ял иткәндә үлгәннәр һәм каза күргәннәр саны буенча Россия дөньяда беренче урында. Күп очракта Россия туристлары бәлага таруларына үзләре гаепле була икән. Бу турыда Россия туриндустрия берлеге хәбәр итә. Быелның 1 гыйнварыннан 30 июненә кадәр, ял иткәндә безнең 224 турист зыян күргән. Бу күрсәткеч буенча Россия Таиланд, Төркия, Мисыр кебек илләрне дә узып киткән.

Таиланд исемлектә икенче урында тора. Быелның алты аенда ял иткәндә 29 таиландлы казага тарыган. Өченче урындагы ике ил – Төркия һәм Вьетнамның 10шар туристы ял иткәндә зыян күргән. Ял иткәндә үлүчеләр саны буенча да Россия – лидер. 2012 елның беренче яртысында 14 Россия туристы һәлак булган.

Россия туриндустрия берлегенең массакүләм мәгълүмат чаралары вәкилләре белән эшләүче белгече Ирина Тюрина сүзләренчә, статистика Россия туристларының теракт яки башка төрле криминаль хәлләр аркасында түгел, ә көтелмәгән бәла-каза яки юл-транспорт һәлакәте нәтиҗәсендә үлүен күрсәтә. Ростуризм компаниясе вәкиле Ирина Щеголькова: “Күп нәрсә туристларның үзләреннән тора”, – ди. Аның фикеренчә, ял иткәндә кешенең проблемаларны онытырга теләп спиртлы эчемлекләр куллануы беркем өчен дә сер түгел. Күп кенә бәла-казалар шуның аркасында килеп чыга да. Шулай ук ул гарәп илләрендә ял итүче Россия туристларының бу илләрнең гореф-гадәтләрен хөрмәт итмәүләре дә көтелмәгән казаларга китерүен әйтә. “Әгәр аларда шәһәр буйлап кыска итәктән, күкрәге ачык булган киемнән йөрү гадәте юк икән, ял итәргә килүче дә моны эшләргә тиеш түгел”, – ди Ирина Щеголькова. Чит илдәге Россия гражданнарын яклау үзәге җитәкчсе Дмитрий Давыденко Россия туристларының үлүенә йөрәк һәм кан тамырлары авырулары сәбәп була ди. “Анда 50 градусов эссе, ә безнекеләр шуңа карамастан үз илендәге кебек еш һәм күп эчә”, – ди ул.