Рөстәм Миңнеханов яшьләрнең тәнкыйтен тыңларга әзер

Республиканың яшьләр оешмаларына активрак булу, үз сафларына тагын да күбрәк яшь көчләрне җәлеп итү, төрле халыкара һәм республикакүләм бәйгеләрдә ешрак чыгыш ясау мөһим, дип саный Рөстәм Миңнеханов.

Әлеге тәкъдимне Татарстан президенты федераль бәйге җиңүчеләре, «Кадрлар резервы» яшьләр проекты финалистлары, яшьләр иҗтимагый оешмалары активистлары белән узган очрашуда җиткерде. «Бүгенге көндә Татарстан үзгәрешләр кичерә. Республиканың фәнни һәм мәгариф өлкәсендәге мөмкинлекләре зур. Татарстанны тагын да үстерү, бөтен дөньяга таныту өчен безгә белемле, югары квалификацияле белгечләр кирәк. Аларны без яшьләр арасыннан эзлибез дә инде. Нәкъ менә сез Татарстанның киләчәген билгелисез», дип яшьләргә мөрәҗәгать итте Рөстәм Миңнеханов.

Татарстанның яшьләр эшләре, спорт һәм туризм министры Рафис Борһанов кунакларны бүгенге көндә республикада яшьләр сәясәтенең торышы, актив эшләп килүче яшьләр программалары белән таныштырды.

Үз чиратында яшьләр дә җавапсыз калмады. Алар президентка үзләрен борчыган мәсьәләләр турында җиткерде, теләк-тәкъдимнәрен кертте. Сизелеп тора, чыгыш ясаган барлык активистлар да республика җитәкчелегенә ярдәм күрсәтергә, Татарстан данын еракларга таратырга, аны үстерергә ашкынып тора. Президент яшьләргә әлеге очрашуны рәсми булмаган әңгәмә рәвешендә алып барырга тәкъдим итте. «Бәлки сезне республика хөкүмәте эшчәнлегенең кайбер моментлары канәгатьләндермидер. Аларның барысы турында да миңа әйтә аласыз. Без сезне тыңлавын-тыңларбыз, ләкин тәкъдимнәрегезнең барысы да тормышка ашачак дип әйтә алмыйм», дип шаяртты президент.

Студентлар Лигасы президенты Тимур Сөләйманов Казанда ЮНЕСКОның халыкара яшьләр үзәген булдыру турындагы планнары белән уртаклашты. Ә Татарстанның студентлар хезмәт отрядлары үзәге директоры Ренат Садыйков исә яңа төзеләчәк «Иннополис» инновацион иярчен-шәһәргә россиякүләм яшьләр төзелеше дигән статус бирергә тәкъдим итте. Тагын бер кызыклы теләк яңгырады очрашуда. Яшьләр сүзенә караганда, Татарстанда фанатлар белән эшли торган махсус оешма булдыру кирәк. Бу халыкара уеннар, ярышлар вакытында җанатарларны контрольдә тотарга, стадионнарда тәртип урнаштырырга булышыр иде, дип саный алар.

Соңыннан Рөстәм Миңнеханов яшьләр оешмалары активистларына мактау билгеләре тапшырды, аларга алга таба уңышлар теләде. Яшьләр көне уңаеннан оештырылган әлеге чарада 200дән артык яшь буын вәкилләре катнашты. Араларында чит ил студентлары да булу әлеге бәйрәм көнен әһәмиятле итеп кенә калмыйча, аның халыкара дәрәҗәдә мөһим булуын да ассызыклагандыр, мөгаен.

 Яшьләр көне уңаеннан Рөстәм Миңнеханов бүген Татарстанның эчке эшләр министрлыгы каршындагы Казан юридик институтын тәмамлаучыларга дипломнар тапшыру тантанасында да катнашты. Югары белем алу турындагы документ һәм лейтенант исеменә быел 190 студент лаек булды. Аларның 30ына кызыл дипломнар тапшырылды. Яшь лейтенантлар Татарстанда гына түгел, ә Чуашстан, Марий Эл, Удмуртия, Чечен республикасы һәм башка төбәкләрдә дә хезмәт итәчәк.