|
|
Бүген кемнәр туган
|
|
Архив
|
25.06.2012 Җәмгыять
Казан артык рекламадан арынаТиздән Казан урамнарында реклама такталарының саны өчтән бер өлешкә кимиячәк. Хакимияттәгеләр, беренче чиратта, шәһәр үзәген аннан-моннан эшләнгән һәм чуар рекламадан арындырырга ниятли. Быел Казанда урнаштырылган барлык стационар реклама корылмаларыныңда диярлек бишьеллык «гамәлдә булу вакыты» чыга һәм аларның хуҗаларына Башкарма комитет белән килешүләрне озайтырга кирәк. Шуннан файдаланып, хакимияттәгеләр рөхсәт ителгән реклама такталарының санын чикләргә булды.
Казан мэриясендә узган чираттагы «эшлекле дүшәмбедә» Башкарма комитетның тышкы реклама һәм мәгълүмат идарәсе җитәкчесе Ирина Дябилкина хәбәр иткәнчә, Татарстан башкаласында реклама такталары 1670 тән 1138 гә калачак. Тышкы реклама объектларын урнаштыру буенча яңа кагыйдәләр кабул ителгән инде. Шулай итеп, законлы реклама урыннары аукционда сатылачак, ә законсыз урнаштырылган рекламаларны исә аларның хуҗалары ел азагына кадәр сүтеп алырга тиеш булачак. Юкса, бу эшкә мэрия үзе алыначак һәм тотылган чыгымнарны хуҗалардан суд аша кире кайтарачак.
Түрәләр фикеренчә, бигрәк тә Казанның тарихи үзәгендә реклама язуларын киметү файдага булачак. Өстәвенә, шәһәр хакимиятен инде күптәннән реклама такталары һәм баннерларның борынгы биналар һәм урамнарны ямьсезләп торганы өчен тәнкыйть утына тоталар. Нәтиҗәдә, яңа тәртипләр буенча тарихи үзәктә 10 квадрат метрдан зуррак булган реклама корылмалары калмаячак.
- Беренче чиратта Кремль, тимер юл вокзалы янындагы, Мәскәү һәм Ершов, шулай ук башка урамнардагы 3x6 метр зурлыгындагы билбордлар алыначак. Бу эшләр шәһәрнең тышкы күренешен яхшыртуга юнәлдерелгән, - ди Ирина Дябилкина.
Шунысын да искәртергә кирәк, Ауропа илләренең күп кенә шәһәрләрендә, шулай ук Мәскәү, Санкт-Петербург, Түбән Новгород, Омск, Ярославльдә тышкы реклама урнаштыруда мондый чикләүләр күптәннән гамәлдә. Моннан биш ел элек Казан да бу «хәрәкәткә» кушылды. Әмма ул чакта шәһәр хакимиятләре яңа реклама такталары урнаштыруны гына тыйды, хәзер исә булганнарын киметергә керештеләр.
Реклама такталары шәһәр үзәгеннән генә түгел, шулай ук юл кырыйлары, күперләр, җәяүлеләр кичүе, транспорт чишелешләреннән дә алыначак. Калган реклама калканнары яңа тәртипләр буенча бер-берсеннән - 90-100, светофор һәм юл билгеләреннән – 60, җәмәгать транспорты тукталышларыннан 25 метр ераклыкта торачак.
Кәрим МИҢНУЛЛИН |
Иң күп укылган
|