Туксанга җиткән карчык тальянда татар халык көйләрен өздерә (ВИДЕО)

Тальян гармунда уйнаучы Маһикамал апа Мәскәү өлкәсендә яшәүче җырчы Әлфинә Әхмәтҗанның әнисе. Кызының иҗат кичәсендә тамашачы аның тальян уйнаганын тын алмый гаҗәпләнеп тыңлап торган.

Әлфинә Әхмәтҗан “Ватаным Татарстан” газетасына биргән бер әңгәмәсендә әнисенең ничек итеп гармунда уйнарга өйрәнгәнен искә ала.

“Әтиләре ике улына, кайсыгыз да булса уйнар әле, дип тальян алып кайткач, ул да уйнарга кызыга. Абыйлары исә, гармун кызлар уенчыгы түгел дип, сеңелләренең ниятен бер дә килештерми. Маһикамалның үз дигәнендә нык торуын белгәнгә, гармунны азрак шыңгырдатып алгач, сандыкка бикләп куялар икән. Ә кыз ачкычны кая яшергәннәрен белеп ала! Өйдә берүзе генә калгач, тальянны сөйрәп алып, көй чыгарырга азаплана. Тырыша торгач, үзлегеннән гармун уйнарга өйрәнгән әнием.

Моннан ике ел элек Мәскәүдә узган концертымда аны да тальянда уйнарга күндердем. Башта: “И, кызым, мин бит намаз карчыгы”,– дип карышкан иде. “Әни, бу талантны сиңа Ходай биргән, синнән безгә күчкән. Килешмәс дип торма, чык инде сәхнәгә”, – дигәч, күнде тагын. Халык аны кат-кат алкышлап чыгарды”, ди Әлфинә Әхмәтҗан. 

Ә хәзер Маһикамал апаның тальянда уйнаганын карыйк: