Телефоннан сөйләшү

– Нихәл, кордаш?

– Картларча.

– Яшәрәсең киләме?

– Ничек итеп?

– Миңа бер китап бүләк иттеләр. Кытайчадан тәрҗемә ителгән диделәр. Кытай массажы турында. Шуны ясатсаң, ун елыңны алып ыргыта икән.

– Бик күп түгелме соң?

– Бу әле бер сеанстан соң гына. Берничә сеанс алсаң, егеткә әйләнәсең.

– Шулай укмыни?

– Шулай язылган.

– Кара син, ә. Безгә җитмеш җидешәр яшь. Алты сеанс алсак, унҗидешәр яшьтә булабызмы? Шәп бит.

– Син әйтәсеңме, минме? Әгәр кызыксынсаң, сиңа да табып бирәм ул китапны.

– Бушкамы?

– Юк, бәясе бар аның. Яшәрү арзанга төшми инде ул.

– Син яшәрдеңме соң әле?

– Тотынырга җыенам.

– Син шунда язылганнарга ышанасыңмы?

– Массажның файдасы бар инде аның. Тик алай ук яшәртүенә ышанмыйм.

– Алайса, нигә шалтыратасың?

– Кызык бит. Син күз алдына китер. Әгәр дә ул китапта язылганнар дөрес булса, без илле-алтмыш яшькә яшәрсәк...

– Нишләр идең соң?

– Белер идек әле... Хәтерлисеңме?

– Кирәкми, сөйләмә. Тыңлап туйган инде.

– Зерә син. Картаясың, бырат.

– Юк, картаймыйм. Мин яшәрүнең серен таптым.

– Ничек итеп?

– Әйтмим.

– Әйт инде.

– Ярый, миннән булсын яхшылык. Син Оренбург дигән шәһәр барлыгын беләсеңме?

– Беләм, билгеле.

– Анда татар театры барлыгын беләсеңме?

– Юк.

– Менә шуны белмәгәнгә картаясың да инде син. Менә шул театрда кызлар бар. Шуларның берәрсенә гашыйк бул. Унсигез яшькә әйләнәсең дә кайтасың. Бернинди кытай массажы да кирәкми.

– Син үзең гашыйк булдыңмы соң?

– Атна саен Оренбургка барып йөрим.

– Оренбург ераграк шул. Камал театры ярамасмы? Анда да кызлар бар.

– Ярый, билгеле. Татарстанда татар театрлары күп. Барысының да кызлары чибәр. Син көн саен театрга йөр. Сәхнәгә кызлар чыккач, үзеңә ошаганын сайлап ал да гашыйк бул. Тик гашыйк булганыңны үзенә әйтмә. Көлеп кәефеңне кыруы ихтимал. Төннәрен уйлап ят. Иртән егет булып уянырсың.

– Син шулай эшлисеңме?

– Син мине тикшермә. Әйткәнне эшлә.

– Карале, берәрсенең исемен әйт әле Камал кызларының.

– Юк инде, бырат. Йә ялгыш үзем гашыйк булганының исемен әйтеп ташлармын.

– Әллә анда да гашыйк булган кызың бармы?

– Булмаска. Миңа бит әле җитмеш җиде генә яшь.