Мөхәммәд пәйгамбәр исемен мыскыллаган журналист хастаханәгә эләкте

Эфир вакытында ислам динен мыскыллаган «Маяк» радиосы журналисты Сергей Асланянга 28 май көнне һөҗүм ясалган. Бүген ул Мәскәүнең Склифосовский исемендәге хастаханәсендә тернәкләнә.

14 май көнне 46 яшьлек алып баручы эфирда автомобильләр турында сөйләгән җиреннән дөньяга ислам дине алып килгән Мөхәммәд пәйгамбәр тормышы турында «үз версиясен» җиткерә. Асланян фикеренчә, ул пәйгамбәрлек итмәгән, Библияне үзенә җайлы итеп күчереп язган, миссиясен уңышлы башкарырга аңа беренче хатыннан бирелгән бай капитал ярдәмгә килгән. Журналист Мөхәммәд пәйгамбәр миссиясен «алдан яхшы уйланылган бизнес-проект» дип атый. Әлбәттә, мондый уйдырмалар ислам динен тотучыларда ризасызлык уятты.

Федераль матбугат чаралары язганча, 28 май төн Сергей Асланянның домофонына шалтыратып, аны аска төшергә чакыралар. Ул төшкәч, билгесез затлар аңа пычак белән берничә тапкыр кадый һәм кыйнап ата. Медикларга журналист үзе мөрәҗәгать итә. Тән җәрәхәтләре, баш мие тетрәве белән аны хастаханәгә китерәләр.

Күпләр кичә булган инцидентны Асланянның радиоэфирда әйтелгән сүзләре өчен үч алу дип кабул итте. Ничек кенә булмасын, кешеләрнең, бигрәк тә журналистларның, төрле диннәрне һәм аларны тотучыларны мыскыллавы, бүгенге җәмгыятьтә игътибарсыз калмый.