Ата-аналар министрлыкны судка бирде

Узган атнада Казанның Вахитов районы судында Татарстанда моңарчы тикшерелмәгән шикаять каралды - 90 нчы гимназиянең 2 нче сыйныфында укучы дүрт баланың әти-әнисе дәреслекләр сатып алуга тотылган акчаларын кире кайтарырга тели.

Китап яхшы керем китерә

Ел саен Татарстан Мәгариф һәм фән министрлыгы мәктәпләрне дәреслекләр белән тәэмин итү өчен бюджеттан йөзләгән миллион сум акча ала. Хисап палатасы тикшерүләреннән күренгәнчә, заказның бер өлеше кулланучыга бик нык соңарып барып җитә. Моның сәбәпләре төрле - түрәләр үз вакытында килешү төземәгән, дәреслекләрне вакытында кайтартмаган... Өстәвенә, күп кенә укытучылар бушка бирелүче дәреслекләрдән канәгать түгел, шуңа күрә алар ата-аналарны яңача төзелгән уку әсбаплары һәм эш дәфтәрләре сатып алырга мәҗбүр итә.

- Узган елның язында оештырылган ата-аналар җыелышында быелгы уку елында балаларга мәктәп китапханәсендә каралмаган яңа уку әсбаплары кирәк булачагы турында кисәткәннәр иде. Ул әсбаплар бер уку елында файдалануга гына яраклы, чөнки балалар аларга язалар, кайбер битләрдәге рәсемнәрен кисеп алалар, - дип аңлата Екатерина Матвеева, аның 90 нчы гимназиядә аның ике улы белем ала. - Болардан тыш, безгә бушка бирелүче дәреслекләргә өстәмә рәвештә эш дәфтәрләре дә сатып алырга куштылар, чөнки алар бушка каралган комплектка керми янәсе. Кайбер ата-аналар әлеге әсбапларны җәй көннәрендә үк сатып алган. Әмма без дәреслекләр өчен акча түләргә теләмичә Татарстан Мәгариф һәм фән министрлыгына мөрәҗәгать иттек. Анда безнең гамәлләр дөрес, ә мәктәп дәреслекләре бушка бирелергә тиеш, дип әйттеләр. Эш шунда тукталып калды. Сентябрь җиткәч исә гимназия директоры баш күтәргән ата-аналарга яңа уку әсбаплары сатып алу турындагы карар ата-аналар комитетында кабул ителде, дип белдерде. Ә дәреслекләрне сатып алырга теләмәгән ата-аналарның балаларына исә, укучылар дәрестә яңа китаплардан рәсемнәр кисеп утырган арада, икенче төрле биремнәр үтәргә яисә ата-аналарга башка дәреслекләрнең күчермәләрен алырга туры киләчәк. Балаларының кимсенүеннән куркып, ата-аналар кирәкле китапларны сатып алды, әлбәттә. Ләкин дәреслекләргә киткән чыгымнарны дәүләттән кире кайтарырга кирәк дигән фикергә килеп, алар ТР Мәгариф һәм фән, Финанс министрлыкларын судка бирде.

Яңа дәреслекләргә тотылган чыгымнар зур булмаса да - гомумән алганда, 2 мең сум турында сүз бара, ата-аналар ярты юлда тукталып калмаска ниятли.

Дәреслектән гаеп эзләмәгез!

Шикаять Вахитов районы судында быел кышын карала башлады. Дүрт утырыштан соң 24 февральдә суд “шикаять бирүчеләр сатып алган уку әсбапларының Россия Мәгариф һәм фән министрлыгы 2011-2012 елларга тәкъдим иткән федераль дәреслекләр исемлегенә кермәвен” сылтау итеп, шикаятьне канәгатьләндермәде. Әмма ата-аналар моның белән генә тынычланмыйча, кассация шикаяте белән мөрәҗәгать итте. Ул 10 майда тикшерелде.

Утырышта Татарстан Финанс министрлыгы вәкиле шикаять бирүчеләрнең таләпләре нигезсез булуын һәм республикада уку әсбапларына каралган акчаларның тиешле максатларда тотылуын әйтте. Татарстан Мәгариф һәм фән министрлыгы вәкиле дә министрлыкның дәреслекләр белән тәэмин итүгә бәйле йөкләмәне тулысынча үтәвен белдерде.

- Дәреслекләрнең барысы да тиешле экспертиза үтә һәм профессорлар тарафыннан хуплана. Гимназия укытучылары һәм ата-аналар комитеты әлеге исемлектәге теге яки бу дәреслекне ни рәвешле яраксызга чыгара ала соң? - дип сорады министрлык вәкиле.

- Чыгара ала! - дип яклады үзенең укытучыларын 90 нчы гимназия директоры Гөлсинә Закирҗанова. - Без тестлар үткәрдек һәм анда яңа дәреслекләр буенча укыган балалар яхшырак нәтиҗәләр күрсәтте...

Мондый аңлатмага каршы министрлык вәкиле кимчелекне дәреслекләрдән түгел, ә укытучылардан эзләргә кушты. Шикаять бирүче ата-аналар да бу сүзләрне яклап чыкты. Судья туктатмаса, бәхәс бик озак дәвам иткән булыр иде әле...

Нәтиҗәдә, ата-аналар тагын оттырды: суд шикаятьне канәгатьләндерүдән баш тартты һәм  судья карарын үз көчендә калдырды. Әмма гимназия әниләре моның белән генә тукталып калырга җыенмый. Суд карарын кулга алгач, алар янә шикаять бирәчәк.