МЕНӘ, ИЧМАСАМ, ТАТАР АТАМАЛЫ КОНКУРС!

Казанда инде икенче тапкыр күселәр күргәзмәсе ачыла. «Яратам!» дип аталган әлеге үзенчәлекле мәдәни чара Татарстан Милли музее бинасында узачак. Күргәзмә Казанның «МОСКт» дип аталган Декоратив күсе яратучылар клубы тарафыннан оештырыла.

Тәүге күргәзмә шулай ук ТР Милли музеенда быел апрель аенда булган иде. Күптән түгел Декоратив күсе яратучылар клубы әлеге күргәзмәгә исем уйлау турында бәйге игълан итте. Аның нәтиҗәләре буенча, «яRATам!» дигән исем сайланды. Ул  татарча «ярату» һәм инглизчә «rat» - күсе сүзләрен аңлата.

Быел да күргәзмә ике көн барачак. Беренче көнне, 18 октябрьдә, күселәр арасында төрле ярышлар оештырылачак һәм иң акыллы күселәргә мактаулы исемнәр тапшырылачак. Күргәзмәдә Казан, Әлмәт, Мәскәү, Санкт-Петербург, Самара, Түбән Новгородтагы Декоратив күселәр яратучылар клублары әгъзалары алып килгән күселәр катнашачак. Алар арасында dumbo, rex, siamese, downunder кебек үзенчәлекле токымлы күселәр дә булачак.

Сәгать 12.30да күселәр «канатка менү» бәйгесендә, 13.15тә – киртәләргә менүдә ярышачак. Сәгать 14.00 – күселәр чабышы узачак, 14.30да – иң таза һәм иң озын койрыклы күселәрне билгеләячәкләр, 15.00да - «күселәр модасы» күрсәтеләчәк. Җиңүчеләр сәгать кичке 4тә тәбрикләнәчәк. Бәяне декоратив күселәр буенча белгечләр – мәскәүле Светлана Симанова белән Анастасия Юстелис бирәчәк.

Күргәзмәнең икенче көнендә, 19 октябрьдә, Милли музейда күселәрне генә түгел, әрлән, су чучкасы, йорт куяны кебек башка кимерүче хайваннарны да күрергә мөмкинлек бар.

Быелгы күргәзмә дә казанлыларда зур кызыксыну уятыр дип көтелә. Узган ел, мәсәлән, аны меңнән артык кеше килеп караган иде.