Айдар Фәйзрахманов Тукай премиясенә тәкъдим ителде

Татарстан Республикасының Габдулла Тукай исемендәге Дәүләт премиясе 1958 елдан алып, ел саен Габдулла Тукай туган көнендә, әдәбият һәм сәнгать өлкәсендә хезмәт куйган күренекле шәхесләргә тапшырыла. 2012 елда бу премиягә кандидат буларак Россиянең атказанган, Татарстанның халык артисты Айдар Фәйзрахманов тәкъдим ителде (2002-2010 елларда Татарстан Республикасы Дәүләт фольклор музыка ансамбленең концерт программалары сериясе өчен).

Татарстан Республикасы фольклор музыкасы Дәүләт ансамбле - киң тамашачы арасында дан казанырга өлгергән яшь коллектив. Ул 1999 елда мәшһүр җырчыбыз Илһам Шакиров инициативасы белән оештырыла. 2002 елдан ансамбльнең сәнгать җитәкчесе булып Татарстанның халык артисты Айдар Фәйзрахманов эшли. Аны халык Татар филармониясенең сәнгать җитәкчесе, укытучы, профессор, телевидениенең популяр алып баручысы буларк та белә. Айдар Файзрахманов сәхнә эшчәнлегендәге зур тәҗрибәсе, музыка, вокал өлкәсендәге тирән белеме, үз эшен җаны-тәне белән яратуы, таланты, музыкаль инструментларда виртуозларча уйнавы, югары дәрәҗәдә хезмәт сөючәнлеге, бар эшне җиренә җиткереп башкару осталыгы, үзенә дә, башкаларга да таләпчән булуы, чын мәгънәсендә могҗиза тудырды: бик кыска вакыт эчендә ансамбль Республикада гына түгел, ә чит илләрдә дә татар халкының милли сәнгатен лаеклы дәрәҗәдә күрсәтә алырлык профессиональ коллективка әйләнде.

Ансамбль, әсәрләренең формасын сиземләве, аларны техник яктан төгәл һәм сәнгатьчә югары дәрәҗәдә оста башкаруы белән башкалардан аерылып тора. Ул тамашачыларга гасырлар төпкеленнән безнең көннәргә килеп җиткән милли мирасны - татар халкының музыкаль фольклорын - театральләштерелгән тамаша аша тапшыра. Айдар Фәйзрахмановның төрле җирләрдән табылган әсәрләрдәге җитешмәгән ноталарны гаҗәеп оста таба белүе, ансамбль репертуарының яңарып торуына, моңарчы яңгырамаган халык көйләренең, татар халкының төрле этник төркемнәренең музыкаль фольклорының туплануына китерә.

Музыка мөхитендә ансамбль үзенең универсаль булуы белән аерылып тора: артистларның барысы да профессиональ дәрәҗәдә җырлыйлар, бииләр һәм төрле музыка уен коралларында уйныйлар. Аларның кулларындагы гармун, курай, кубыз, онытыла башлаганнардан – гөслә, саз, сорнай, думбыра, ятаган, җәя, гаҗәеп матур яңгырыйлар.

Ансамбль, Россия буйлап ( Ижау, Мәскәү, Санкт-Петербург, Түбән Новгород, Тольятти, Ульяновск, Усинск ( Коми АССР), якын (Украина, Кырым) һәм ерак чит илләргә (Австрия, Германия, Франция, Литва, Польша, Төркия, Финляндия) гастрольләргә чыгып, милли сәнгатебезне пропагандалауга һәм татар музыка фольклорын дөньяга танытуга бик зур өлеш кертә.

Айдар Фәйзрахманов җитәкчелегендәге Татарстан Республикасының фольклор музыкасы Дәүләт ансамбле эшчәнлеге Республикабызның мәдәни тормышында искиткеч вакыйга булып тора. Кыска гына вакыт эчендә, ансамбльнең уннарча төрле программалары төзелде, йөзләрчә концертлары куелды. Бүгенге көндә, сәнгать җитәкчесенең актив һәм профессиональ югарылыктагы хезмәте нәтиҗәсендә, татар халкының музыкаль фольклоры бөтен дөнья буйлап яңгырый. Аның иң гүзәл үрнәкләрен пропагандалау, җир шарының төрле төбәкләрендәге бүгенге көн тамашачысын татар фольклоры белән таныштыру буенча бик зур мәдәни-агарту, концертлар оештыру эшчәнлеге алып бара ансамбль.