|
|
Бүген кемнәр туган
|
|
Архив
|
30.03.2012 Мәдәният
Үтереп гашыйк булыр идем!Мамадыш кызы Рәмзия Сафина якташлары каршында чыгыш ясаячак. Әлмәт театрының “Студентлар” комедиясенә 5се Үсәли, 6се Мамадыш, 7се Шәдче, 8-апрельдә Урта Кирмәнгә рәхим итегез! Медицина институтында укучы хәйләкәр кыз Рәмзия Нәүширбәнова - укытучысы яшь профессор Усман Сабирович белән тулай торакта яшәүче дус кызы Рәмзиянең бүлмәсендә бикләнеп калалар. Ишек бикле, тәрәзәдән биек... Бүлмәдән чыгу юлларын гына түгел, тормыш кыенлыкларын җиңү юлларын да бергә эзлиләр алар.
Рәмзия Нәүширбәнова – Мамадыш кызы Резеда Сафинаның профессиональ сәхнәдә чыгарган беренче роле. “Студентлар” комедиясен карап, аның героинясына ваемсыз калган кеше булмагандыр. Резеда Мамадыш районы Үсәли авылында туып үсә, мәктәпне тәмамлагач Казан театр училищесында Камал театры артисты Илдар Хәйруллин курсында укый. Училищены тәмамлагач Әлмәт Татар дәүләт драма театрына эшкә килә. “Казаннан соң Әлмәткә күнегүе авыррак булды, Казанны, студент чагымны бик сагынам. Ләкин чынбарлыктан аерылып торган кызыклы хыялый театр тормышы мине бик тиз үзенә алып кереп китте. Сәхнәдә тормышта булмаган мөмкинлекләр туа бит, шуның белән театр мине үзенә җәлеп итте дә. Әгәр дә мөмкинлек булса, үтереп гашыйк булыр идем мин сәхнәдә! – ди Резеда, - беренче спектаклем “Студентлар” комедиясенә килгәндә, спектакль искиткеч, аны әзерләве дә бик рәхәт булды. Без бер курстан 5әү килдек Әлмәткә. “Студентлар”да да барыбыз бергәләшеп уйныйбыз, гел укыган вакыттагы кебек. Исеменнән үк күренгәнчә спектакль студентлар – бүгенге яшьләр – безнең үзебез хакында. Замана ритмында куелган бу спектакльдә уен-көлке, җыр-бию, музыка да яшьләрчә. Минемчә, бу спектакльне караган өлкәнрәк тамашачылар – безнең әти-әниләр- яшьлек елларының иң матур вакытларын, күңел түрендәге якты хәтирәләрен яңартып, уңай эмоцияләр белән кайтып китәләрдер. Чөнки спектакль һәрбер кешенең тормышында була торган онытылмаслык, кызыклы, маҗаралы вакыт – студент еллары турында”.
Мамадыш кызы Резеданың үз якларына хас эшчәнлек, тырышлык кебек сыйфатлары һәм сөйкемле сөяге бар. “Сәнгатькә юлым бала чактан, өйдә бергәләшеп әтинең баян уйнаганына кушылып җырлап утырулардан башлангандыр. Вакытында әти этәргеч бирмәсә, бәлки артистка да булып китмәс идем. Туган ягымда спектакль уйнау минем өчен иң элек әтием каршында имтихан тоту.” Студент чагында училище сәхнәсендә Галиябану, Мәйсәрәләрне уйнаган Резеданы Әлмәт тамашачы да яратып кабул итте. Ул безне яңа, матур, кызыклы рольләре белән сөендерер дип ышанабыз, уңышлар телибез!
1
2
Эльмира ХАРИСОВА |
Иң күп укылган
|