Авылларда быел су булырмы?

Белгечләр республикада быел зур су басу булмас, дип ышандыра. Алай да, су күтәрелү ихтималы булган елга, күлләр контрольгә алынган.

20 март көнне Татарстан Хөкүмәте йортында әлеге мәсьәләгә багышланган брифингта су басуны кисәтү өчен республикада барысы да эшләнелә, дип белдерелде. Ләкин март ахыры-апрель башында явым-төшем нормадан күбрәк булса, Казансу (Биектау, Арча районнарындагы өлеше), Анзирка, Гөбнә, Шушма һәм башка елга һәм инешләрдә су биеклеге 30-140 сантиметрга җитүе ихтимал. Республиканың гражданнар оборонасы һәм гадәттән тыш хәлләр министры урынбасары Николай Суржко 15 марттан ук елгаларда боз ваттырыла башлавын, су басуны булдырмас өчен 4 мең автомобиль техникасы, 3 вертолет, 20 мең кеше әзер тора дип хәбәр итте. 1 апрельгә кадәр елгаларда боз вату, күпер торбаларын чистарту эше төгәлләнергә тиеш. Чөнки 5 апрельдән республиканың көнбатыш якларында боз кузгалуы көтелә.

Нинди су кулланабыз?

Су биеклеге әз генә күтәрелсә дә, яр буендагы үләт базлары, зарарлы матдәләр саклана торган складларга су үтә. Берничә ел элек Кама Тамагы районында мондый хәл күзәтелгән иде инде. Быел исә, Татарстан Министрлар Кабинетының Ветеринария идарәсе башлыгы Булат Камалов сүзләренә караганда, мондый куркыныч юк. Ул бары тик авыл җирләрендә яр буйларында терлек калдыклары, чүп-чар булмавын гына карарга кушты.

Татарстан буенча Роспотребнадзор идарәсе җитәкчесе Марина Патяшина беледерүенчә, ташу вакытында эчә торган суларның пычрану ихтималы зур. Ләкин бу күрсәткечнең елдан-ел кими баруы уңай күренеш. Әйтик, быел алган су пробалары химик, биологик яктан узган елгы анализ нәтиҗәләреннән яхшырак, ягъни эчә торган суның пычрану дәрәҗәсе кимрәк. Марина Патяшина яз дәвамында мондый тикшеренүләрнең әле берничә тапкыр ясалачагын да әйтеп узды.

Авылларга куркыныч янамыймы?

Язын су әз генә күтәрелсә дә, ул табигатькә зыян китерә. Су кире төшкәч, балык уылдыклары ярда кала, су кошларының оялары күчә, ә бу бәбкәләргә суга төшүне кыенайта. Су артуның тискәре яклары булган кебек, аның җитмәве дә шактый авырлыклар тудыра. Бүген брифингта хәбәр ителгәнчә, Куйбышев сусаклагычында су күләме артыграк булган, ул хәзер кимеп, 49,25 метрны тәшкил итә. Ә менә көнчыгыш районнарда быел кар аз яву сәбәпле, Түбән Кама сусаклагычында су биеклеге 62,13 метр булса да, бу энергетиклар эшендә уңайсызлыклар китереп чыгара икән. Балтыйк системасы буена биредә су биеклеге 62,5 метр булырга тиеш.

Ләкин белгечләр әйтүенчә, Татарстанда туфрак шактый дымлы (120 процент). Шуңа хәзерге фаразлар нигезендә авыл хезмәтчәннәрен куандырырга ашыктылар. Шулай да җәен суның җитү-җитмәү мәсьәләсе, гидрометеорог Галина Жданова фикеренчә, язгы ташу вакытында елгаларның ни дәрәҗәдә тулуына карап кына билгеләп булачак. Быел сусызлык 2010 елдагы кебек авыл халкының кесәсен юкартмас, тормышына зыян китермәс, дип ышанасы килә.