“Төш”не күрми калмагыз!

23 һәм 24 нче март көннәрендә Кәрим Тинчурин исемендәге Татар дәүләт драма һәм комедия театры Туфан Миңнуллин әсәре буенча куелган “Төш” мелодрамасының премьерасын күрсәтә.

Спектакльне сәхнәгә театрның баш режиссеры Россиянең атказанган артисты, Татарстанның атказанган сәнгать эшлеклесе Рәшит Заһидуллин куйды. Рәссамы Роман Моров (Татарстанның атказанган мәдәният хезмәткәре), композиторы Чыңгыз Абызов, Хореографы Ләйсән Хәмитова (Татарстанның халык артисткасы), Хормейстеры Резедә Шакирова.

Спектакльдә катнашалар:

Татарстанның халык артистлары – Ләлә Миңнуллина, Зөләйха Хәкимҗанова.

Артистлар – Гөлназ Нәүмәтова, Илфак Хафизов, Лия Вилданова, Резедә Сәләхова, Артем Пискунов, Булат Зиннәтуллин, Тимур Баһаветдинов.

«Төш» пьесасы – Т.Миңнуллинның яңа әсәрләренең берсе.

Бер-берсен өзелеп сөйгән ике йөрәк – Елена белән Камил кавышалар. Инде дөньяда алардан да бәхетле кеше юк. Чөнки алда күпме бергә каршылыйсы алсу таңнар, киләчәккә якты өметләр, татлы хыяллар... Ләкин гаилә кояшын бик тиз кара болытлар каплый. Бәхет иленә алып барырга тиешле сукмак, нигәдер аларны упкын читенә китерә. Кем гаепле? Сәбәп нидә? Төрле менталитет вәкилләре булудамы? Әллә дөньяга караш, эчке халәтләрнең үзара тәңгәл килмәвендәме?..

Тере музыка, бихисап халык җырлары яңгыраган әлеге спектакль тормыш үзе тудырган төрле җитди сорауларга җавап эзли.