|
|
Бүген кемнәр туган
|
|
Архив
|
25.02.2012 Мәдәният
Актриса Люция Галләмова ФОТОальбомын актарабызЛюция Галләмованың быел юбилей елы. Биш ел элек булган юбиленда Тинчурин театры ремонтка ябылу сәбәпле, кичәсен Камал театры сәхнәсендә уздырды ул. Әйтергә кирәк, театрларда еш тәҗрибә түгел бу. Артистлар бәйрәмнәрен үз сәхнәләрендә уздыруны кулай күргән кебек, театрлар да башка театр артистларына сәхнә бирергә ашкынып тормыйлар. Академия театрында узган әлеге кичәдә театрның директоры Шамил Закиров әйткән сүзләр истә калган: «Люция бар тормышын театрга багышлаган, театр дип яшәүче, театр дип сулаучы хатын-кыз. Аның башка тормышы юк. Театрдан башка яши дә алмас иде ул. Юбилеен безнең сәхнәдә уздыру – Люциянең чын актриса, чын сәхнә кешесе икәнлеген тануыбыз билгесе». Люция уңган хатын. Тормышлар буталган, артистларның гына түгел, бөтен илнең дөнья көтәрлек хәле калмаган 90 елларда, әллә нинди, ирләр башы да җитмәслек эшләр белән дә шөгыльләнеп алды ул. Кайдадыр уңды, кайдадыр «янды». Тик ул беркайчан да театрдан китмәде. Туры сүзе өчен ике еллап «кыскартылып» торса да, театрына кире кайтты. Кайтырга тиеш иде. Актриса бит ул!
1. «Безнең авылга да әллә ничә елга бер тапкыр фотога төшерүче килә иде. Ул заманда бөтен фотолар да бер төсле булгандыр. Кечкенә баланы һәрчак урындыкка бастырып төшергәннәрдер. Бу фото икеләтә кадерле, мин Галләм бабам белән, аның иңбашына кулымны куеп, аңа таянып төшкәнмен. Бер яшь ярымлык Люция белән чал сакаллы бабам».
2. «Әтием Заһит белән әнием Сәүдәҗиһан тигезлектә 50 ел гомер иттеләр. Җиде бала үстереп, аякка бастырдылар. Бүгенге көндә мәрхүмнәр булсалар да, әти-әни күңелдә, догада. Рухлары безнең өчен шат булса иде, ярабби».
3. «Миңа инде 4 яшь тулган. Әти-әнинең иң олы кызы булгангадыр, күлмәкнең иң матур борчаклысын, яулыкның иң матур чәчәклесен алганнар үземә».
4. «Театр училищесында укыган елларны һәр артист иң матур еллар дип искә аладыр, мин дә шулай. Гөрләшеп укыдык, шаулашып өмәгә йөри, булмаганны бар итеп яши белә идек».
5. «Шаһа апа. Бигрәкләр дә ярата идек үзен. Әниебез кебек иде ул безгә. Затлылык, зыялылык үрнәге. 1977 елның 28 апрелендә төшерелгән фото бу. Шаһа апаның алдында кызы Җәмилә, янында мин һәм курсташ кызлар».
6. «Менә нинди ул безнең ишле гаилә. Җиде балалары уртасында әти белән әни. Бу вакытта мин инде актриса. 1981 елда төшерелгән фото».
7. «Театр училищесын тәмамлагач, филармониядә концертлар алып баручы булып эшләдем. Ике ел Әлфия Авзалова, Вафирә Гыйззәтуллина, Венера Шәрипова бригадалары белән гастрольләрдә йөрдем. Ул елларда Актерлар йортында очрашу кичәләре еш була иде. Шундый кичәләрнең берсендә Батулла һәм Вафирә Гыйззәтуллина белән. 1979 ел. 29 гыйнвар».
8. «Диңгезгә беренче тапкыр Әлфия апа Авзалова белән бардым. Ялта. 1979 ел, сентябрь».
9. «Мөфти Равил Гайнетдин һәм аның җәмәгате Зөһрә театр училищесында безнең белән бер курста укыдылар. Алар Казанга кайтса да, без Мәскәүгә барсак та, очрашмый калмыйбыз. 2005 ел, декабрь».
10. «Кызым Айсылу – иң газиз кешем. Яшәвемнең шатлыгы да, мәгънәсе дә. 2011 ел., август».
11. «Хатын-кыз бәхете – бик зур бәхет ул. Мин озак еллар ир җилкәсенә ышыкланмыйча, тормышны үзем тарттым. 2011 ел мине таяныч булырлык ир белән кавыштырды. Ислам белән без күптән таныш булсак та, бер-беребезне тапмый ничә еллар аерым яшәгәнбез. Законлы никахлашкан көнебез. 2011 ел, 16 август».
Күпме уйнаса да, уйнап туймый артист халкы. Люция дә уйнап туймаган әле. Ташып торган энергиясе, таланты бар. Уйнатыгыз Люцияне! Татарга, сәнгатькә хезмәт итәргә дип, ярсу аттай ашкынып торган актриса күңелен шулай гына басып була.
Земфира ГЫЙЛЬМЕТДИНОВА сәхифәсе |
Иң күп укылган
|