ТАТАР-ТӨРЕК ЛИЦЕЕ УКЫТУЧЫСЫННАН ХАТ

Татарстанда уңышлы гына эшләп килүче татар-төрек лицейларын бер-бер артлы тикшерү, төрек укытучыларына виза, укытуга рөхсәт бирелмәү турында “И.М.”ның алдагы саннарында язган идек инде. “Инглиз телендә укыткан Төркия укытучыларына виза бирелмәде. Шуңа күрә алар Татарстанга килә алмыйлар. Республикада 57 төрек укытучысы иде, шуларның 26сы Казанда эшләде. Аларның берсе дә биредә калмады”, – диде хәбәрчебезгә Казан шәһәре Башкарма комитеты җитәкчесенең киңәшчесе Марат Вазыйх улы ЛОТФУЛЛИН. 15 ел 7 нче лицей-интернатта эшләгән Әркан Чарпанның 1 сентябрь алдыннан укучыларына юллаган хатын кыскартып тәкъдим итәбез.

Олы ихтирамга лаек бик хөрмәтле җитәкчем Илдар әфәнде һәм аның урынбасарлары Нурия ханым, Гөлниса ханым, Альберт әфәнде, Айдар әфәнде, тәрбияче иптәшләрем, мәктәптәге барлык эшләүчеләр, яраткан укучыларым һәм аларның кунакчыл ата-аналары!

Инде 15 ел су кебек агып та киткән... Татарстанга килгән беренче көннәрем бүгенгедәй исемдә. Тик нигәдер быелгы җәйге каникулның очы-кырые күренми. Аның төгәлләнүен һәм укучыларым белән очрашуны сагынып, зарыгып көтеп торам, ләкин “ишекләрне ябып куйдылар, хәзер анда бара алмыйсыз. Быел укучыларыгызга һәм аларның ата-аналарына кавышыр өчен озак көтәргә кирәк, сабыр булыгыз”, диләр. Әмма тагы күпме сабыр итмәк кирәк?..

Ана кеше нәни баласын күрмичә күпме вакыт түзә алса, укытучы да укучыларын күрмичә шул чаклы гына түзә аладыр, мөгаен. Бала нихәтле шук, сүз тыңламый торган булса да, ул әнисенә һәрвакыт кадерле. Ана кеше кирәк булса татлы җанын аямыйча баласы өчен корбан итә ала. Укытучы күп очракта үз балаларыннан бигрәк укучыларын кайгыртып яши. Минем өчен укучыларым да менә шундый кадерле. Алар өчен кирәк булса җанымны кызганмыйча фида итәргә әзермен!

Күпме тыңлаусыз булсалар да, дәрес хәзерләргә яратмасалар да, аларны – Тимурны, Илдарны, Фәритне, Русланны, Рөстәмне, Әнвәрне, Иванны, Андрейны, Диманы, Артурны, Илнурны, Таһирны, Динарны, Дамирны, Рушанны, Исламны һәм аларның ата-аналарын шундый сагындым... Ант итеп әйтәм – көн дә кулларымны күтәреп, Шәфкатьле Раббымнан укучыларым, ата-аналар һәм сезләр белән яңадан кавыштыруын ялварып сорыйм. Мәктәбен, укучыларын, ата-аналарын шундый яраткан укытучылардан нинди начарлык көтәргә мөмкин?!

Татарстан безнең беренче чирканчык алган ил булды. Эшли башлаган, иң дәртле яшьлек елларыбызны корбан иткән, чәчләребезне агарткан, бала-чагабызны үстергән, тәҗрибәләр туплаган, чын дуслар тапкан, укытып чыгарган укучыларыбызның җимешен күргән һәм ахыр чиктә 15 ел гомер сөргән ил ул Татарстан.

15 ел ул кеше гомеренең якынча биштән бер өлешен тәшкил итә. Тормышымның иң күркәм 15 елын шул җирләрдә үткәрергә насыйп иткән өчен Ходайга мең рәхмәтлемен. Боерган булса, тагы ничә 15 елларны да аңа багышларга әзербез. Әгәр дә миннән: “калган гомерегезне Татарстанда үткәреп һәм ахыр чиктә ул җирләрдә вафат булып, анда җирләнергә теләр идегезме?” – дип сорасалар, ике дә уйламыйча, “әйе!” дип җавап бирер идем. Шундый бәхет безгә тәтер микән, Ходаем?

15 ел буе 1 сентябрь – Белем көнен укучыларыбыз, ата-аналар һәм сезләр белән бергә каршы алдык. Ләкин быел моңсу, ямансу бәйрәм үткәрергә мәҗбүр булабыз. Укучылар, ата-аналар белән булмагач, нинди бәйрәм инде ул?! Бәлкем, бәйрәм анда да күңелсез, борчулы үтәчәк. Шулай да, күңелләребез бергә булганда ямансу минутлар да күңелле мизгелләргә әйләнер, боерган булса.

Мин чын күңелемнән ышанам – 1 сентябрь иртәсендә укытучы абыйларыгыз тәннәре белән анда булмаса да, йөрәкләре, җаннары белән сезнең арагызда булачаклар, моңа сез дә ышаныгыз.

 Безне сорашкан, сорашмаган, белгән һәм белмәгән һәркемгә ихлас күңелдән кайнар сәламнәребезне юллыйбыз. Йөрәкләребез һәм хәер-догаларыбыз гел сезнең белән булачак. Зинһар өчен, безне онытмагыз, изге догаларыгыздан ташламагыз.