1 гыйнвардан «Татарстан – Яңа Гасыр» радиосы «Болгар радиосы»на әйләнәчәк

Татар телле аудиториянең якын дустына әверелгән “Яңа Гасыр” радиосында яңа елдан соң зур үзгәрешләр көтелә. 2012 елның 1нче гыйнварыннан «Татарстан – Яңа Гасыр» радиосы «Болгар радиосы» тапшыруларын тәкъдим итә башлаячак. Радиога яңа сулышны яшь алып баручылар гына түгел, яңа тапшырулар да өрер дип көтелә.

Эш көннәрендә чыгучы тапшырулар үз сафын киңәйтә. Әйтик, тыңлаучылар үз итеп өлгергән «Хак дин», «Автомобиль дөньясында», «Безнең спорт», «Сөенче» кебек тапшырулар белән беррәттән «Уңыш формуласы» (янәшәбездәге, үз көчләре белән тормыш үрләрен яулаучы кешеләр язмышы турында), Татарстаннан читтә яшәүче татарлар тормышын яктыртачак «Газиз халкым», тыңлаучыларның хатлары буенча төзелгән «Җырлы сәлам» кебек тапшырулар эфирга чыгачак. Яңа тапшырулар исемлеген ял көннәрендә эфирга чыга башлаячак татар әдәбияте турындагы «Минем дөнья», сәхнә һәм театр тормышын яктыртучы «Тамаша», авыл кешеләре һәм тарихы хакында сөйләүче «Туган авылым» тапшырулары дәвам итә.

Моннан тыш тыңлаучыларның игътибарына яңа сәхифәләр тәкъдим ителәчәк. Әйтик, хатын-кызлар өчен «Тылсымлы көзге». Асыл затларның серләшергә, үз тәҗрибәләре белән уртаклашырга яратуы беркемгә дә сер түгел. Сәхифә шуны исәпкә алып уйланылган. Һәр чыгарылыш бүләкләр уйнату белән үрелеп барачак.

«Болгар радиосы»ның ир-егетләргә дә бүләге бар. «Ирләрчә» сәхифәсендә алга киткән технологияләр, икътисад һәм бизнес турында сөйләшүләр булыр дип көтелә.

Тик моның белән генә, сюрпризлар төгәлләнми. «Һәр татарның йөрәгендә!» – девизы белән үз эшчәнлеген башлап җибәрәчәк «Болгар радиосы»ның төп яңалыгы – һәр иртәдә эфирга чыгачак «Чәк-чәк шоу» радиотамашасы. Ике егет һәм бер кыз һәр иртәне тыңлаучыларны яхшы дулкынга көйләячәк, җайлап кына уятачак һәм кайгыртып, эшкә озатачак.