Казанда 8 яшьлек кыз мошенникларга 80 мең сум күчергән

Вакыйга онлайн-уендагы чатта башланган. Кызчыкка чит кеше язган һәм үзен уендагы валюта — робукслар буенча ярдәмче итеп таныштырган.

Ул бонуслар вәгъдә иткән, әмма моның өчен акчаны өлкән кешенең банк счетыннан күчерергә кирәклеген әйткән. Кыз әбисенең телефонын алган. Мошенник исә аңа онлайн-банкка керү һәм берничә түләү ясау буенча адымлап инструкция биргән.

Нәтиҗәдә, 62 яшьлек хатын-кызның счетыннан якынча 80 мең сум акча күчерелгән. Ә вәгъдә ителгән робукслар, әлбәттә, килмәгән. Хатын-кыз полициягә мөрәҗәгать иткән. Әлеге факт буенча мошенниклык турында җинаять эше кузгатылган.

Полиция ата-аналарга балаларга банк кушымталарына мөстәкыйль керергә мөмкинлек бирмәскә киңәш итә. Уен чатларында чит кешеләр тәкъдим иткән «бушлай бонус», «робукс», «скин» яки башка бүләк өчен акча күчерүне сорасалар, моның мошенниклар хәйләсе булырга мөмкинлеген аңлатырга кирәк.

Иң мөһиме — бала шикле хәбәр алса, акча күчерергә яки сылтамага басарга ашыкмыйча, әти-әнисенә сөйләргә тиеш. Уендагы виртуаль бүләкләр чын акчага әйләнмәсә дә, мошенниклар аркасында гаилә бюджеты чынлап та зыян күрергә мөмкин.