Яздан бирле аюлар 22 кешене үтергән: хөкүмәт җитди чаралар әзерли

Россия Хөкүмәте, аюларның кешеләргә ташлану очраклары ешаю сәбәпле, җитди чаралар әзерли башлаган. Эш шунда: илдә көрән аюлар нык ишәйгән.

Дәүләт мониторингы мәгълүматларына караганда, соңгы 30 ел эчендә аларның саны ике тапкырдан күбрәккә үсеп, хәзер 300 меңнән артып киткән, дип яза «РИА Новости».

«Әлбәттә, популяция арту проблемалар китереп чыгара. Кешеләр һәм хайваннар арасында күршелекнең иминлеген тәэмин итү, шулай ук кирәкле балансны саклау өчен җитди чаралар күрергә кирәк», – дигән вице-премьер Дмитрий Патрушев.

Борчылырлык өчен сәбәпләр, чыннан да, да бар. Соңгы мәгълүматлар буенча, яздан бирле Россиядә аюлар ким дигәндә 22 кешене үтергән.