Равил Закиров һәм Миләүшә Хәкимова никахлашып өлгермичә аерылышканнар...

Дүрт ел дуслашып йөргәннән соң татар блогерлары Равил Закиров һәм Миләүшә Хәкимова аерылышу турында хәбәр иттеләр

Танылган татар блогерлары Равил Закиров һәм Миләүшә Хәкимова дүрт ел дәвам иткән мөнәсәбәтләрнең тәмамлануы турында хәбәр иттеләр. Шул ук вакытта күптән түгел алар клип төшерү булып чыккан туй фотосурәтләрен бастырганнар иде

“Без моннан дүрт ел элек таныштык. Һәм баштан ук ул минем игътибарымны бик нык җәлеп иткән кеше иде. Ә аннары безнең дуслык акрынлап тагын да зуррак хискә әверелде. Ул мине Казанда беренче тапкыр ресторанга алып барган кеше. Ул мине яңа кешеләр, артистлар белән таныштырды, миңа ниндидер яңа мөмкинлекләр ачты. Күп очракта аның ярдәмендә мин шәхси блогта үстем. Һәм минем тормышымның ниндидер чорында ул чыннан да минем зур ярдәмем булды. Мин аны бик нык ярата идем. Ләкин шуның белән бергә безнең мөнәсәбәтләрдә катлаулыклар, үпкәләр, аерылышулар һәм кире кайтулар күп булды. Хисләр шулкадәр көчле булды, хәтта эмоциональ яктан авыр була башлады. Һәм болар барысы да безнең һәрберебез өчен үсеш ноктасы булды. Без үзгәрдек, бер-беребездән өйрәндек, төрлечә үттек. Һәм ниндидер мизгелдә бездә гаилә төзергә зур теләк туды. Әмма бу хыял тормышка ашмады”, - дип язган Миләүшә Хәкимова.

Кызның сүзләренә караганда, ул дүрт еллык мөнәсәбәтләрне сызып ташларга теләми һәм булган хәлләре өчен Равилгә бик рәхмәтле. Закиров үзе аерылышуны берничек тә шәрехләмәде, әмма Хәкимова постына комментарийларда ул аны машина йөртергә өйрәтүе турында язган.