Екатеринбургта «Байгал» фильмын күрсәтәчәкләр

14 октябрьдә «Билгесез төбәк киносы» проекты кысаларында Екатеринбургта Илдар Ягъфәровның тормышка ашмаган хыяллар турындагы «Байгал» картинасы күрсәтеләчәк.

Илдар Ягъфәров 2018 елда төшергән «Байгал» фильмы белән быел Екатеринбургта узган «Билгесез төбәк киносы» проекты төгәлләнә. Сеанстан соң режиссер Илдар Ягъфәров белән иҗади очрашу була.

“Байгал”ның сценарий авторы – Мансур Гыйләҗев, продюсерлары – Миләүшә Айтуганова һәм Илдар Ягъфәров. Рольләрне Ренат Галимов, Миләүшә Айтуганова, Фирая Әкбәрова, Владимир Вдовиченков башкара.

Фильмның сюжеты болайрак – авыл читендәге кечкенә бер өйдә берүзе генә Галимҗан яши. Кайчандыр ул гаиләсе, яраткан эше һәм киләчәккә зур планнары булган уңышлы композитор булган, «Байгал» симфониясен язган. Мифларда Идел елгасында яшәүче һәм теләкләрне тормышка ашыручы балыкны шулай дип атыйлар. Көннәрдән бер көнне кешеләр Байгалга ышанудан туктыйлар һәм ул юкка чыга. Хыяллар артыннан куып, Галимҗан үз бәхетен җимерә һәм дөньядан аерылып, хәзер ялгыз тормыш алып бара. Нәкъ менә шул вакытта ул улын җинаятьтә гаепләүләрен һәм ирегеннән мәхрүм итү белән янауларын белеп ала...

«Билгесез төбәк киносы» проекты 2026 елның маенда башланган иде. Бу проект кысаларында Россиянең төрле төбәкләрендә төшерелгән фильмнар күрсәтелде.

«Байгал» фильмы Екатеринбургның Кино йортының зур  залында булачак. Керү ирекле.