Марат Җәббаров җитәкчелегендәге Татарстан делегациясе Куала-Лумпурда MIHAS 2026 халыкара хәләл продукция күргәзмәсендә булды

Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров җитәкчелегендәге Татарстан Республикасы Авыл хуҗалыгы һәм азык-төлек министрлыгы делегациясе эш сәфәре белән 23 сентябрьдән 26 сентябрьгә кадәр Куала-Лумпурда уза торган Malaysia International Halal Showcase 2026 (MIHAS 2026) 22нче халыкара хәләл продукция күргәзмәсендә булды.

MIHAS 2026 - Малайзиянең Инвестицияләр, сәүдә һәм сәнәгать министрлыгы ярдәмендә уздырыла торган хәләл индустриянең төп дөньякүләм B2B-мәйданчыкларының берсе, аны Малайзиянең тышкы сәүдә корпорациясе (MATRADE) оештыра. Быелгы күргәзмәнең темасы - «Shaping Trust», Driving Resilience («Ашаныч тудырып, тотрыклылыкны ныгытып»). Дистәләгән илдән 45 меңләп профессионаллар килү көтелә, сәүдә килешүләренең максатчан күләме - 4,5 млрд Малайзия ринггиты.

Сәфәрнең беренче көнендә Марат Җаббаров Global Halal Summit 2026 күргәзмәсендә һәм күргәзмәнең рәсми программасы чараларында катнашты, Россиянең күмәк экспозициясе һәм Татарстан Республикасы предприятиеләре стендлары белән танышты, профильле Малайзия ведомстволары һәм оешмалары җитәкчеләре белән элемтәләр урнаштырды. Шулай ук Halal Development Corporation (HDC), Малайзия авыл хуҗалыгы һәм азык-төлек иминлеге министрлыгы һәм Малайзиянең авыл хуҗалыгы тикшеренүләре һәм эшләнмәләре институты (MARDI) вәкилләре белән эшлекле очрашулар, шулай ук International Sourcing Programme (INSP) кысаларында Татарстан компанияләренең B2B-сөйләшүләрдә катнашуы планлаштырылган.

MIHAS 2026 күргәзмәсендә Россия экспозициясе 14 компанияне берләштерә: аларның тугызы «Агроэкспорт» ФДБУ исемлегенә кертелгән, тагын бишесе төбәк блогына кергән. Килүчеләргә бөртекле ашлык һәм май продукциясе, ит һәм сөт товарлары, кондитер әйберләре, балалар ризыгы, натураль эчемлекләр, чәй продукциясе һәм функциональ продукция, шулай ук «Хәләл» сертификация органнары тәкъдим ителде. Күргәзмә мәйданы Малайзия ягы тарафыннан үзара алмашу турында килешү кысаларында тәкъдим ителде: элегрәк Малайзия экспозициясе Казанда «Россия - Ислам дөньясы: KazanForum 2026» форумында тәкъдим ителгән иде.

Татарстан өчен MIHAS күргәзмәсендә катнашу - Малайзия һәм Көньяк-Көнчыгыш Азия илләре базарларына чыгу өчен импортерларны, дистрибьюторларны һәм партнерларны турыдан-туры эзләү инструменты. Республиканың экспорт потенциалы шактый зур: 2025 ел йомгаклары буенча АПК продукциясе 539,4 млн доллар күләмендә экспортланган, продукция дөньяның 49 иленә 90 экспортер тарафыннан җибәрелә. Аерым стратегик юнәлеш - «Хәләл» продукция: 2025 елда аны экспортлау күләме 45 млн долларга җиткән, бу 3,2 тапкырга күбрәк, ә 2026 елның сигез аенда - 35 млн долларлык. Республикада 354 мең тоннадан артык хәләл продукция җитештерелә.

Татарстан белән Малайзия арасындагы үзара файдалы мөнәсәбәтләр партнерлыкны ныгыта һәм «Халыкара кооперация һәм экспорт» илкүләм проекты максатларына туры килә.