Халыклар дуслыгы йортында Марсель Вагыйзовның концерты узды (ФОТО)

Татарстанның Халыклар дуслыгы йортында республиканың атказанган артисты Марсель Вагыйзовның сольный концерты узды. Музыкаль кичә татар эстрадасы җанатарларын, балалы гаиләләрне һәм төрле милләт кунакларын бергә җыйды.

Кичәне Илүзә Шәрифуллина алып барды. Артистны тәкъдим иткәндә, алып баручы аның тормыш юлын искә төшерде: Саба районы Айдаров авылында туып-үскән Марсель биш яшьлек малай чагында ук гармунда уйнарга өйрәнә. Бүген ул – татар эстрадасының иң якты башкаручыларының берсе, Илһам Шакиров, Салих Сәйдәшев исемендәге һәм «Татар моңы» халыкара конкурслары лауреаты, «Болгар радиосы» Милли премиясе иясе, Салих Сәйдәшев исемендәге Дәүләт зур концерт залы солисты.

Артистның репертуарында – татар халык җырлары, эстрада композицияләре, ретро-хитлар һәм мөнәҗәтләр бар. Аның сүзләренчә, әгәр җыр тирән мәгънә йөртә һәм изге гамәлләргә этәрә икән, ул рухи камилләшүгә үзенчәлекле бер чакыру булып хезмәт итә ала.

Концертның үзенчәлеге – аның тамашачы белән җанлы аралашу рәвешендә узуында булды. Һәркем үзенең яраткан көйләренә кушылып җырлый алды, зал читтә калмады: балачактан таныш моңнар хор белән яңгырады.

Бөтен кичә дәвамында Марсель Вагыйзовны Татарстан Республикасының атказанган артисты Рөстәм Рәхмәтуллин җитәкчелегендәге «Мирас» инструменталь ансамбле озата барды. Алып баручы билгеләп үткәнчә, ансамбльнең исеме үк аның төп миссиясен — милли музыкаль традицияләрне саклау һәм аларга заманча яңгыраш бирүне күрсәтә. Коллектив 2007 елның ноябрендә Н. Җиһанов исемендәге Казан дәүләт консерваториясе ректоры Рубин Абдуллин башлангычы белән оештырыла. Башта ул консерватория студентларыннан тора, ә вакыт узу белән профессиональ инструменталь ансамбльгә әверелә һәм бүгенге көндә Татарстан Халыклары дуслыгы йорты каршында эшли.

Рөстәм Рәхмәтуллин — җитәкче генә түгел, ә аранжировкалар авторы да: ул татар, башкорт, монгол һәм кытай халык көйләрен эшкәртә, аларны концертта яңгырашлы итеп яраклаштыра. Аның сольный чыгышлары Германия, Италия, Франция, Греция, Чехия, Финляндия, Төркия, Казахстан, Кытай, Сербия, АКШ һәм Канадада узды.

Кичә музыка белән генә чикләнмәде. Кунаклар өчен татар җырлары һәм күренекле шәхесләр турында интерактив квиз әзерләнгән иде: тамашачылар сорауларга җавап бирделәр, ә иң актив катнашучылар бүләкләр алды.

Татарстанның атказанган артисты Гөлнара Гыймаева җитәкчелегендәге «Алтын-Золото» хореография мәктәп-студиясе чыгышы программаның бизәге булды, яшь артистлар сәхнәгә ике тапкыр чыктылар.

Кичә артист һәм музыкантлар белән фотосессиядән соң тәмамланды.