«Заманында Казанда өч гаилә бергә яшәдек»

 

— Алдагы сезонны 20 апрельдә үк япкан идек. Төркемдә барлыгы 16 кеше эшләдек. Сезонны төгәлләгәч, еллык тыгыз эшчәнлектән соң бераз көч туплыйк дип, бер атнага Мисырга ялга барып кайттык. Юмор остасы, җырчы Рамил Шарапов гаиләсе һәм без бергә бардык. Бик күңелле, рәхәт булды. Июнь Сабантуйлар белән узып китте. Җиде-сигез районда чыгыш ясадым. Быел Бөтендөнья татар конгрессы белән Үзбәкстанның Ташкент шәһәрендә беренче тапкыр Сабантуйда булдык. Җәйне сизми дә калдык. Туган авылым Бакайга да, хатыным Диләрә ягына Түбән Камага да кайттык. Ике якта да, Аллаһка шөкер, әти-әниләребез исән-сау. Үземнең туган авылдагы йортта бик күп эшләр эшләнде. Бакча гына түгел, каралты-кура, коймаларны яңарту, төзекләндерү белән мәшгуль булдык.

 

 

— Йортыбыз Константиновкада, Живописный дип аталган яңа бистәдә урнашкан. Әзер өй алмадык. Коры җирдә барысын да үзебез төзеп кердек. Дөресрәге, осталардан эшләттек. Төзелеш эше бетте, дисәң дә була. Торырга урын, мунча, гараж бар. Барысы да әйбәт. Рәхәтен күреп, сөенеп яшәргә генә. Үз йортың белән яшәгәч, күп итеп бәрәңге үстереп яталар, дип уйлыйлардыр. Бездә алай түгел, бераз җиңелгәрәк салдык: территориядә газон, чәчәкләр үсә. Аларын да гел карап, тәртиптә тотарга кирәк әле. Бәрәңге җире авылда да җитәрлек. Төрле сорт бакча җиләге утырткан идек. Быел рәхәтләнеп ашадык, бик эре булды. Чия, алмагач утырттык. Чия булмады. Ә алмагачлар беренче тапкыр бирде: берсендә — 30, икенчесендә 12 алма үсте.

 

 

— Әйе, Казанда ипотекага фатир алып, шунда яшәдек, дип сөйләгәнем бар иде. Өч гаилә, барлыгы уннан артык кеше берничә ел бер түбә астында тордык. Бергә дус-тату яшәдек. Күңел иркен булсын. Хәзер инде күптән алай түгел. Барыбыз да үз гаиләсе белән аерым торабыз. Ул ипотекага алган фатир абыйларга калып, алар аны сатып, уртанчысы Илгиз безнең бистәдән төзелеп бетмәгән йорт алды. Шунда яшиләр. Әкренләп эше бетеп килә инде. Олы абыем Илдус гаиләсе белән Казанда фатирда яши.