Бүген театр әһелләре Кәрим Тинчуринны искә алды (ВИДЕО, ФОТО)

Бүген, бөек татар драматургы, режиссеры һәм татар профессиональ театрына нигез салучыларның берсе Кәрим Тинчуринның туган көнендә, аның исемен йөрткән паркта Россия Театр әһелләре берлеге аллеясына нигез салу тантанасы узды.

Иртән актерлар, режиссерлар, театр хезмәткәрләре Кәрим Тинчуринны искә алдылар, рухына дога кулдылар һәм каберенә каберенә чәчәк салдылар. Ә аннан соң Тинчурин паркында агач-куаклар утыртылды.

Кәрим Тинчурин 1910 елда «Сәйяр» труппасына килә һәм гомерен татар театрына багышлый. Артист буларак сәхнәгә чыга, пьесалар яза, спектакльләр куя, театрның киләчәген формалаштыра. 1922 елда Татар дәүләт театр труппасын оештыруда катнаша.

Салих Сәйдәшев белән иҗади тандемы татар музыкаль драмасына яңа сулыш бирә. «Сүнгән йолдызлар», «Зәңгәр шәл», «Казан сөлгесе», «Кандыр буе» кебек әсәрләре татар театрының алтын фондына керә.

Тинчурин әсәрләрендә мәхәббәт тә, җәмгыять тә, кеше язмышы да бар. Иң мөһиме, ул күтәргән сораулар бүген дә искермәгән.

“139 ел узган. Ә Тинчурин һаман сәхнәдә. Аның сүзләрендә, геройларында, без уйнаган спектакльләрдә”, – ди тинчуринлылар.