Казанда XIV яһүд музыкасы фестивале узды (ФОТО)

Яһүд музыкасы фестивале Казанда 2012 елдан бирле уздырыла. Аның программасында яһүд халык җырлары, клезмер музыкасы, заманча авторлык әсәрләре һәм эстрада номерлары тәкъдим ителә.

Быел Яһүд милли-мәдәни автономиясе 25 еллык юбилеен билгеләп үтә. Бу дата мәдәни мирасны саклау, мәгърифәтчелек һәм иҗади башлангычларны үстерү буенча күпьеллык эшне гәүдәләндерә.

Яһүд музыкасы фестиваленең рәсми өлешен тантаналы рәвештә Татарстан Республикасы Яһүд милли-мәдәни автономиясе рәисе Аркадий Плискин ачып җибәрде. «Без бу фестивальне инде ундүртенче ел рәттән үткәрәбез. Бу ел Яһүд милли-мәдәни автономиясе төзелүнең 25 еллыгына багышланган. Аңа нигез салучы Михаил Абрамович Скоблионок иде. Аның якты истәлеге күңелләребездә яшәр», – диде ул.

Сәламләү сүзе белән Татарстан халыклары Ассамблеясе Советы Башкарма комитеты җитәкчесе, ТР Дәүләт Советы депутаты Ренат Вәлиуллин да чыгыш ясады. Ул бу фестивальнең әһәмиятле вакыйгага әверелүен һәм шәһәр халкының зур мәхәббәтен яулавын ассызыклады.

Фестиваль традицияләр һәм заманчалык очрашу мәйданына әверелде: программада – клезмер ансамбльләре чыгышлары, авторлык проектлары, халык җырлары һәм заманча аранжировкалар яңгырады.

Татарстанның халыклар Дуслыгы йорты директоры Тимур Кадыйров бу фестивальнең мәдәниятләр бердәмлеген, традицияләргә хөрмәтне һәм Татарстандагы халыклар дуслыгын күрсәтүен ассызыклады.

Катнашучылар арасында Казанның «Симха» ансамбле, Ульяновскның «Нэфеш», Мәскәүнең «Чистое небо» төркемнәре һәм башка башкаручылар бар иде. Тамашачыларга күпмилләтле Татарстан мотивларын һәм яһүд музыка мәдәниятен берләштергән театральләштерелгән тамаша да күрсәтелде.