Халыклар дуслыгы йортында Россия халыклары телләре көненә багышланган бәйрәм узды (ФОТО)

Бәйрәм мәктәп балалары өчен әзерләнгән «Дуслык һәм татулык дәресләре» дигән әдәби программа белән башланып китте. Аны Татарстан халыклары Дуслыгы йорты һәм Роберт Миңнуллин исемендәге Республика балалар китапханәсе оештырды.

Яшь тамашачылар Россия халыклары әкиятләре буенча китап күргәзмәсе карадылар, халыклар бердәмлеге елына багышланган китап кыстыргычлары ясау буенча мастер-класста, уеннарда һәм Тукай иҗатына багышланган викторинада катнаштылар.  

Халыклар Дуслыгы йортында төрек теленнән сынау дәресе дә узды. Күпмилләтле якшәмбе мәктәбенең төрек бүлеге укытучысы Әнҗе Мәхмүтова балаларны төрек халкының мәдәнияте һәм гореф-гадәтләре белән таныштырды.

Бәйрәм «Дуслык һәм татулык дәресләре» дигән мәдәни-мәгърифәти проект белән дәвам итте. Укучылар «әйе/юк» карточкалары ярдәмендә төрле милләт кешеләре арасындагы дуслык турындагы сорауларга җавап бирделәр, мәдәни аермаларга карамастан, уртак тел табуга нәрсә ярдәм итүе хакында фикер алыштылар. Балалар шундый нәтиҗә ясадылар – чын дуслыкка тәрҗемәче кирәкми, ул башка мәдәнияткә карата хөрмәт һәм кызыксынудан башлана.

Соңыннан бик матур концерт программасы булды. Бәйрәм бергәләп «Туган тел» һәм «Дружная семья» җырларын башкару белән тәмамланды.