Казанда «Россия халыкларының традицион костюмы» дигән фестиваль узды (ФОТО)

4-6 сентябрьдә Казан «Россия халыкларының традицион костюмы» дигән Бөтенроссия фестивале мәйданчыгына әверелде. Әлеге чарада 20 төбәктән 400дән артык кеше катнашты.

Фестиваль программасында 5 номинациядә конкурслар, күргәзмәләр, ярминкә һәм Казан Кремле ишегалдында дефиле оештырылды. Татарстан Республикасының мәдәният министры Ирада Әюпова билгеләп үткәнчә, фестиваль үз тамырларыңа кайту һәм мәдәни кодны аңлауда ярдәм итә.

«Костюм – ул халыкның җаны. Аны белергә, аңларга һәм өйрәнергә кирәк», – диде фестивальне оештыручы Наталья Калашникова.

Конкурста соңгы дүрт елда иҗат ителгән костюмнар һәм курчаклар коллекциясе күрсәтелде.

Катнашучылар биш номинациядә көч сынаштылар:

* «Этнографик костюм» – милли костюмны реставрацияләү һәм реконструкцияләү. Биредә локаль үзенчәлекләрне һәм традицион технологияләрне саклау мөһим шарт иде.

* «Сәхнә костюмы»: иҗади коллективларның репертуарына туры китереп традицион костюмны органик рәвештә стилизацияләү.

* «Заманча авторлык костюмы»: бүгенге көннең мода таләпләренә җавап бирүче, әмма традицион кием бизәлешен, орнаментларын һәм образын саклаган костюм.

* «Традицион костюм кигән курчак»: милли костюмның үзенчәлекләрен чагылдырып кулдан кулдан ясалган авторлык курчагы.

* «Костюм аксессуарлары»: кулдан ясалган билбаулар, баш киемнәре, бизәнү әйберләре, аяк киемнәре һәм башка элементлар.

Пушкин исемендәге Мәдәният үзәгендә өч көн дәвамында конкурс күрсәтүләре һәм дефилелар үтте. Биредә тамашачылар һәм жюри әгъзалары Россия халыкларының милли костюмнарын карый алды. Ә уникаль һөнәрчеләр үзәгендә (ЦУМ) берьюлы өч күргәзмә ачылды: «Россия халыкларының традицион костюмы», «Традицион костюм кигән курчак», «Костюм аксессуарлары».