Бүген Зөмәррә Рәхим кызы Халитовага 100 яшь тулды (ФОТО)

Габдулла Тукай исемендәге Татар дәүләт филармониясенең сәхнә ветераны Халитова Зөмәррә Рәхим кызына 5 сентябрьдә 100 яшь тулды.

Зөмәррә Халитованың тормыш кагыйдәләрен барлыйк әле.

* Озын гомернең сере – тормышны яратуда. Яратып яшәргә кирәк. Мәхәббәт белән, иҗат итеп, барысына да: шатлыгына да, кайгысына да рәхмәтле булып.

* Кеше тормышында иң кыйммәтлесе – иҗат. Гомер буе нәрсә дә булса иҗат итәргә кирәк. Менә мин кечкенәдән шулай эшләдем. Иҗат һәр кешенең табигатендә бар.

* Гомерем озын булды, анда шатлыгы да, уңышы да шактый инде. Алар арасында төп казанышым – дүрт бала анасы булуда.

* Авыру кирәк икән ул. Яныңда нинди кешеләр туплануын белер өчен кирәк. Һәм мин шуңа инандым: бу дөнья начар түгел, әйбәт кешеләр күбрәк.

“Аны күркәм юбилее белән ихластан котлап балаларының игелеген күреп гомер кичерүен телибез”, – дип язганнар филармониялеләр.