Тәмәкене ничек ташларга? Тәмәке урынына чупа-чупс!

 

–Никотинга бәйлелек барлыкка килгән икән, тәмәке тартуны ташлау җиңел түгел, ләкин мөмкин. Бу кешенең ихтыяр көченнән тора. Иң беренче, теләк кирәк. Тәмәкенең сәламәтлеккә китергән зыянын аңлау мөһим. Мин бар танышларыма да киңәш итәм – тәмәке ташларга җыенганны бөтен кешегә әйтегез. Алар сиңа тәмәкенең зыянын искә төшереп, биргән вәгъдәңне үтәргә кирәклеген искәртеп торсыннар. Берәр тартучы кеше белән бергә тәмәкене ташласаң да әйбәт. Беренче атнада организм никотин таләп итәчәк. Кеше бу вакытта ломка кичерә. Ачуы килә, башы авырта. Сәламәтлеге нык какшаган, никотинга бәйлелекне кисәк бетерү аркасында хәле начарланырга мөмкин буган кешеләргә тәмәкене алыштыра торган дарулар тәкъдим ителә. Хәзер никотинлы пластырьлар, сагызлар, спрейлар җитәрлек. Алар организмга чиста никотинны бик аз дозада җиткерә һәм бәйлелектән акрынлап котылырга ярдәм итә.

 

 

–Тәмәке тартучы кешеләр гел авызда нидер булганга күнеккәнбез, диләр. Шуңа да тәмәкене сагыз, суыра торган кәнфит, чупа-чупска алыштырырга була. Тәмәкегә психологик бәйлелекне җиңүе дә җиңел түгел. Кайберәүләр электрон сигаретлар тәмәке тартуны ташларга ярдәм итә диләр. Тик бу тәмәкенең бер төреннән икенчесенә күчү генә. Бу мәсьәләне хәл итми. Медицинада алты ай тәмәкесез торсаң, кеше тартуны ташлаган дип санала. Дөрес, бер тарткан кеше вакытлар узгач та моңа кире әйләнеп кайтырга мөмкин. Бу кешенең организмына, ихтыяр көченә, психологик фактораларга бәйле. Тәмәке тартуны ташлагач йөрәк, үпкә һәм кан тамырлары авырулары куркынычы кими, янәшәдәге якын кешеләреңә дә төтен белән зыян китермәвеңне истә тоту мөһим.