Көз башында Татарстанга 27 градуслы җылы һава торышы кайта

Агымдагы атнада Төньяк Атлантикадан килгән циклон йогынтысында Татарстанда температура фонының күтәрелүе көтелә. Бу хакта ТР Гидрометеорология үзәге фаразына сылтама белән «Татар-информ» хәбәр итә.

Узган ялларда төбәктә коры салкын һава торышы урнашты (-1 градуска кадәр). Мондый һава шартлары Россиянең Европа территориясенең күпчелек өлешендә аз болытлы циклон хакимлек итүгә бәйле. Әмма бүген үк республиканың көнбатыш районнарына ерак төньяк атлантик циклонының җылы атмосфера фронты якынлашырга тиеш.

Иртәгә үк, 1 сентябрьдә, әлеге фронталь бүленеш тәэсире нәтиҗәсендә Татарстанда һава җылыначак. Төнлә +8...+13 градус, көндез +18...+ 23 градус булачак. Урыны белән кыска вакытлы яңгырлар булуы ихтимал.

Чәршәмбе һәм пәнҗешәмбе, 2 һәм 3 сентябрьдә, республика циклонның җылы секторында булачак. Сизелерлек явым-төшем көтелми. Караңгы вакытта һава температурасы +7...+14, якты вакытта +22...+27 градус тәшкил итәчәк.

Метеорологларның беренчел мәгълүматларына караганда, җомга һәм шимбә, 4 һәм 5 сентябрьдә, төбәктә җылы һава торышы сакланачак, урыны белән кыска вакытлы яңгырлар көтелә. Төнлә термометр баганалары +9...+14 градуска кадәр төшәчәк, ә көндез +20...+25 градуска кадәр күтәреләчәк.

Элегрәк Россия Фәннәр академиясенең А.М. Обухов исемендәге атмосфера физикасы институты директоры, Россия Фәннәр академиясе академигы Владимир Семенов алдагы көздә аномаль явым-төшемнәр һәм алар аркасында су басулар куркынычы турында кисәткән иде.