Татар китабы йортында «Язучы портфеле» дигән күргәзмә ачылды (ФОТО)

Җыйнак һәм ямьле бүлмәдә урнашкан экспозиция әдәбиятка, әдәби әсәрләргә авторларның шәхси әйберләре – аларның көндәлек эшенең бер өлеше булган кирәк-яраклар аша карарга тәкъдим итә.

Күргәзмәдә Гаяз Исхакыйның өстәлен, Мөхәммәт Мәһдиевнең сәгатен, Габдрахман Әпсәләмовның күзлеген, Нурихан Фәттахның язу машинкасын һәм татар әдәбияты тарихы белән бәйле башка әйберләрне күрергә мөмкин.

Әлеге күргәзмә ниндидер конкрет бер язучының гына эш кабинетын күрсәтми. Бу – төрле чорлар, авторлар һәм язмышлар очрашкан җыелма бүлмә. Монда кергәч, язучы бүлмәдән менә хәзер генә чыгып киткән дә, тиздән кереп яңадан эшенә утырыр кебек тоела.

«Язучы портфеле» ярым-иммерсив форматта оештырылган: кайбер предметларны музей экспонаты буларак карап кына калмыйча, аларга кагылырга, хәтта эшләп карарга да мөмкин. Бүлмәдә тамашачылар чишәргә тиешле табышмаклар да яшерелгән.

Күргәзмәнең үзәгендә «СҮЗ» дигән яктылык композициясе. Монда сүз – язучы эзләнүенең – җөмләләр әле китап булып әверелмәгән мизгелнең символына әйләнә. «Язучы портфеле» – язылып беткән әсәр чикләреннән чыгып, язучы утырган мохиткә күз салу һәм әдәбият туа торган киңлекне тою мөмкинлеге бирә.