Халыклар Дуслыгы йортында Республика көне уңаеннан күргәзмә ачылды (ФОТО)

Татарстанның халыклар Дуслыгы йортында «Нәсел мирасы – яшь йөрәктә» дип аталган күргәзмә ачылды. Биредә Казан шәһәренең 4 нче балалар сәнгать мәктәбенең яшь рәссамнары үз эшләрен тәкъдим итте.

Күргәзмә өч мөһим темага: Татарстан Республикасы көненә, Россия халыклары бердәмлеге елына һәм Татарстандагы Хәрби һәм хезмәт батырлыгы елына багышланган. Рәсемнәрдә – Казанның архитектура гүзәллеге, Татарстанның мәдәни кодлары һәм күп гасырлык традицияләре.

Әлеге проект Һәйкәлләрне саклау җәмгыяте катнашында тормышка ашырылган һәм ул Казан белән Татарстанның Бөек Җиңүгә керткән өлешен искә төшерүне максат итеп куйган. Күргәзмә кунаклары Казанны балалар күзлегеннән хезмәт батырлыгы шәһәре буларак күрделәр, биредә кырыс сугыш елларында мәктәп сыйныфлары госпиталь палаталарына әйләнгән, ә дини корылмаларның диварлары хәрби комиссариатлар эшен күргән. Мондагы һәрбер рәсем халыкның авыр сугыш елларындагы каһарманнарча батырлыгын искә төшерә.

Катнашучыларны һәм кунакларны Татарстан халыклары Ассамблеясе Советы Башкарма комитеты җитәкчесе, ТР Дәүләт Советы депутаты Ренат Вәлиуллин сәламләде. Ул тарихи хәтерне кадерләп саклау һәм аны буыннан-буынга тапшыруның никадәр әһәмиятлек икәнен әйтте. Ренат Вәлиуллин билгеләп үткәнчә, иҗат аша балалар әйләнә-тирә дөньяның чын кыйммәтен аңлыйлар һәм ватаныбызга сакчыл карарга өйрәнәләр, ә мондый күргәзмәләр үткән заман белән киләчәк арасында күпергә әйләнә. Ренат Вәлиуллин яшь рәссамнарга иҗат җимешләре өчен рәхмәт белдерде һәм ирешелгән уңышларда тукталып калмыйча, алга таба да иҗат итүләрен, тормышларын якты вакыйгалар белән тулыландыруларын теләде.

«Нәсел мирасы – яшь йөрәктә» күргәзмәсе үсеп килүче буын йөрәгендә тарихи хәтернең никадәр саклык белән саклануын күрсәтүче якты вакыйгага әйләнде. Чараны Татарстанның халыклар Дуслыгы йорты оештырды.