Яңа сезонда Тинчурин театрыннан нәрсә көтәргә?

Тинчурин театры 93 сезонга зур яңалыклар белән аяк баса. Репертуар да, бина да үзгәрә. Яңа сезонда театр ай саен диярлек премьера тәкъдим итәчәк.

Яңартылган бина

Театрның директоры Фәнис Мөсәгыйтов сүзләренчә, артистлар ялда булган арада бинада төзекләндерү эшләре башкарылган.

— Торбаларны алыштырдык, фоейда, балконда үзгәрешләр бар. Тамашачылар өчен уңайлыклар да тудырдык. Фоейда 4 урында куллер урнаштырдык. Тамашачылар бушлай су эчә алачак. Буфетта чиратны киметү өчен театрда автоматлар да урнаштырдык. Теләгән кеше каһвәне автоматтан гына ала, мәсәлән. Тәнәфес вакыты кыска, шуны да исәпкә алырга тырыштык, — ди директор.

«Лу» — тугрылык кыйссасы

Сезонны премьерадан башлыйлар. Танылган актриса Нәфисә Хәйруллина сәхнәгә кайта. Аның белән без аерым әңгәмә дә эшләгән идек. Ул Хәсән Туфанның хатыны Луиза Салиәскәрованың тормышына багышланган «Лу» спектаклендә төп рольне башкарачак. Хәсән Туфан ролен — Идел Кыямов уйнаячак.

— «Лу» пьесасы авторы — Илгиз Зәйниев. Ул аны иң элек кино сценарие итеп язган иде. Нәфисә Мәскәүдә яшәгәч, спектакльләр ике көн рәттән уйналачак, — диде Айдар Җаббаров.

Яңа сезон — яңа режиссерлар

Быел репертуарга классик әсәрләр дә, эксперементаль спектакльләр дә булачак. Чакырылган режиссерлар да күп була. Казахстаннан Фәрһәд Мулдагали, тумышы белән Иорданиядән хәзер Санкт-Петербургта иҗат итүче Надя Кубайлат, Янис Брайловский, Уфадан Айрат Абушахманов. Айдар Җаббаров үзе дә спектакль әзерлиячәк, әмма нинди әсәрне сайлавы әлегә сер.

— Сезонның икенче премьерасын шәхсән үзем бик көтәм. Брехтның «Добрый человек из Сычуани» әсәрен куячакбыз. Яңа елга кадәр тамашачылар яратып өлгергән «Казан егетләре»нең дәвамы булачак. Балалар өчен «Питер Пен» әсәрен чыгарачакбыз, — диде Айдар Җаббаров. Тинчурин театрының яңа сезоны августта башлана.

Илгизә Галиуллина

Шәһри Казан