Миләүшә Айтуганова: «Бу – иң кадерлеләребез – әти-әниләребез хакындагы тарих» (ФОТО)

Кичә Казанның «Мир» кинотеатрында Кытай киносы көннәре ачылды. Әлеге вакыйга «Ростки: Россия һәм Кытай – үзара файдалы хезмәттәшлек» IV Халыкара форумы кысаларында үтте.

Казан тамашачысына тәкъдим ителгән беренче фильм – «Мәңгелеккә җавап» («Ответ на вечность») дигән тетрәндергеч гаилә драмасы иде. Картина белән фильмның режиссер Чжэн Юньчан үзе таныштырды. Бу фильм – режиссерның әбисенә багышланган һәм аның шәхси хис-тойгыларын чагылдырган әсәр.

Чжэн Юньчан фильмны төшерү аның өчен үз хисләрен белдерү ысулы булуын әйтте. Сюжет нигезендә аның гаиләсе тормышыннан алынган реаль вакыйгалар ята. Режиссер сөйләгәнчә, 1976 елда аның туган шәһәрендә күп кешеләрнең гомерен өзгән җир тетрәү була. Бу трагедияне кичергән әбисе зур югалту күзгә-күз очраша, һәм бу хәсрәт аның йөрәгендә гомерлеккә уелып кала. Еллар узгач, Чжэн Юньчан әбисенең төзәлмәслек авыру булуын белгәч, аларның уртак тарихын экранда теркәп калдырырга карар итә.

«Мин нәни чагымда ук үлемнең нәрсә икәнен белә идем, ләкин аның минем әбиемә дә кагыла алуын аңламаганмын», – дип үз хисләре белән бүлеште Чжэн Юньчан.

«Алтын минбәр» XXII Казан халыкара кинофестиваленең башкарма директоры Миләүшә Айтуганова әлеге картинаның югары кыйммәтен билгеләп үтте. «Фильмда тасвирланган хәлләр, кызганычка каршы, тормышта еш очрый. Бу – югалту, тәрбия һәм безнең иң кадерлеләребез – әти-әниләребез һәм якыннарыбыз хакындагы тарих», – дип әйтте ул.

Миләүшә Айтуганова «Мәңгелеккә җавап» фильмының Минскидагы «Листопад» һәм «Золотой Ворон» дип аталган Арктика халыкара кинофестивалендә лауреат булуын да әйтте.  

Кытай киносы көннәре кысаларында тамашачылар «Коткаручылар» (Спасатели) дигән анимацион фильм да карадылар. Ә бүген, 18 августта, «Бәхетле кечкенә су асты көймәсе: Аждаһа белән маҗаралар» дигән мультфильм күрсәтелде.

Текст: Матбугат ру.