Музыкаль-әдәби лекторий 82нче сезонын башлады (ФОТО)

16 августта Габдулла Тукай исемендәге Татар дәүләт филармониясенең музыкаль-әдәби лекторие үзенең оешуына 81 ел тулуны билгеләп үтте һәм 82нче концерт сезонын ачты.

Әлеге коллектив Габдулла Тукай исемендәге Татар дәүләт филармониясенең генә түгел, ә бөтен Татарстанның иң өлкән коллективларның берсе булып тора.

Әдәби-музыкаль лекторий дөньякүләм танылган классик музыканы пропагандалау белән беррәттән, рус һәм татар профессиональ композиторларының, шагыйрьләрнең әсәрләрен, шулай ук халык иҗатын тамашачыга җиткерү буенча зур эшчәнлек алып бара. Озак еллар дәвамында биредә республикабызның күренекле сәнгать осталары иҗат итә. 2014 елдан лекторийны Татарстанның халык артисты Владимир Васильев җитәкли. Бүгенге көндә биредә югары профессиональ мөмкинлекләргә ия булган артистлар, халыкара конкурслар лауреатлары: Татарстанның халык артисты Георгий Ибушев (тенор), талантлы яшь җырчылар Ригина Вәлиева (сопрано), Игорь Макаров (баритон), Роман Чуйнов (концертмейстер) эшли. Концертларда артистлар башкаруында төрле жанрдагы әсәрләр: опера, романс, халык көйләре яңгырый. Алар филармониядән тыш республикабызның төрле шәһәрләрендә, районнарында, югары һәм урта уку йортларында, мәктәпләрдә, санаторийларда чыгыш ясый. Шулай ук лекторийның солистлары ТР халык уен кораллары дәүләт оркестры концертларында да катнашалар. Яшь буынга музыкаль-эстетик тәрбия бирү максаты белән коллектив яшь тамашачыларга да берсеннән-берсе эчтәлекле, зәвыклы концерт программаларын тәкъдим итә.