Чирмешәндә шимбә көнне суган бәйрәме узачак

Шимбә көнне Чирмешән районының Чирмешән авылында төбәкара “Луковая долина” фестивале узачак. Фестиваль Россия халыклары бердәмлеге елына багышлана.

“Луковая долина” фестивале “Сабунтуй” стадионында булачак. Биредә кунакларны һөнәрчелек һәм суган ярминкәләре, мастер-класслар, суганнан ясалган сыйларны һәм милли ризыкларны татып карау көтә. Балалар өчен халык уеннары белән уен зонасы да оештырылачак.

Фестиваль кысаларында “Борынгы һәм стилизацияләнгән милли җырлар” вокал һәм фольклор сәнгате конкурслары, борынгы йолалар конкурсы, этно-чибәркәй конкурсы, инструменталь музыка һәм “Суган сугышлары” конкурслары оештырылачак.

Фестиваль РФ халыкларының милли күптөрлелеген һәм бердәмлеген саклау, Татарстан Республикасы муниципаль районнарыннан, Идел буеннан һәм Россия Федерациясенең башка төбәкләреннән килгән фольклор коллективлары белән  хезмәттәшлек итү, Чирмешән районында эко-туризмны үстерү максатыннан үткәрелә.