Җырчы Диләрә Илалетдинова: “Без тиздән дүртәү булабыз”

Татар эстрадасында бәби-бум дәвам итә. Бу юлы җырчы Диләрә Илалетдинова сөенчесе белән уртаклашты.

“Без тиздән дүртәү булабыз”, – дип хәбәр итте. Аның белән хәбәргә чыгып, хәл-әхвәл белештек.

– Сездә сөенче икән, котлыйбыз! Бу хәбәрне ничек белдегез?
– Бик зур рәхмәт! Башта үзем белдем, беркемгә дә әйтмәдем. Хастаханәгә барып, кирәкле анализларны тапшыргач, йөкле булуым раслангач кына әйттем. Аннан улым белән әтиебезгә сюрприз ясадык.  

– Алдан планлаштырдыгызмы әллә Аллаһ Тәгалә бүләгеме?
– Планнарда инде күптән бар иде. Ләкин ул бездән генә тормый шул. Кызганыч хәлләр дә булды. Хастаханәгә йөрдек, бу теманы күңелебезгә авыр ала идек.  Аннары: “Барсыда Аллаһы Тәгалә кулында”, – дип бу ситуацияне җибәрдек. Ярты елдан сөенечле хәбәр алдык.

– Гендер-пати оештырырга уйлыйсызмы? Кем буласын беләсезме?
– Баланың кызмы малаймы икәне үзебез өчен дә сер. Исән-сау тугач, Аллаһ бирса, безгә сюрприз була.

– Хәзер “партнерские роды” турында да еш сөйлиләр. Сезнең дә андый тәҗрибәдә катнашасы килмиме?
– Тормыш иптәшем беренче балабыз туганда ук барырга теләде. Анализлар тапшырдык, әзер идек. Әмма бала тапкан көнне хастаханәдә кызамык эпидемиясе дип “партнерские роды” тыйдылар. Мин еладым, иремнең дә кәефе төште, күзләре яшьләнде. Авыр булды. Иремнең янәшәдә булуына бик өметләнгән идем. Бу юлы насыйп булыр дип ышанабыз инде. Тагын берәр нәрсә килеп чыкмаса...

– Иҗат нинди хәлдә? Яңа җырлар, чыгышлар көтәргәме? Сәхнәгә чыгу теләге көчлеме?
– Яздырылмаган жырларым калды, җәй бик эссе бит, хәлем юк. Өйдә кондиционер астында гына хәл җыям әле (көлә). Концертларга чакыралар, әмма әлегә ризалашмыйм. Сабан туенда да бер мәйданчыкта Нурлатка гына бардым. Анысы да бик авыр булды, шуннан соң мәҗлесләргә чакыруларны да кире кактым. Әлегә ял итәм. Шулай да өйдә эш бетми. Улыбыз Данияр беренче сыйныфка укырга керә. 6 яшьтән бирәбез. Шуңа тырышып мәктәпкә әзерләнәбез әле.