Әлмәт драма театрында премьера

Әлмәт татар дәүләт драма театры 8, 9 декабрь көннәрендә “Тормыш корабы” (“Непростая история”) спектакленең премьерасын тәкъдим итә.

Әсәр Әмирхан Еникинең “Шаяру”, “Тынычлану”, “Төнге тамчылар”, “Матурлык”, “Бер сүз”, “Мандарин сатучы” хикәяләренә нигезләнеп язылган. Исценировка авторы – Фәридә Исмәгыйлева. Спектакльнең режиссеры Уфадан Гүзәл Акбердина, рәссам – Димитрий Хильченко, балетмейстер – Наталья Соколова.

Спектакльдәге вакыйгалар “Шаяру” хикәясендәге Диләрә белән Харис тирәсенә тупланган. Үзәктә яулык иясе Харис, яулык белән бергә яшь егетнең мәхәббәтен дә үзенеке итәргә теләгән Диләрә. Ана, Нина, Мәрвәр, Гасыйм Сәләхович, Семен Семенович, Хәлил Ишмаев образлары аша яшәешнең гади һәм тирән мәгънәле күренешләре сурәтләнә.

Спектакльдә режиссер психологик театр белән контепри бию стилен берләштерә. Хис-кичерешләр тышкы сурәт белән түгел, күңел тирәнлеге аша бирелә. Психологизм, махсус тыелып, басым ясау өчен генә кулланыла һәм психологик театр кечкенә форма ала.

“Тормыш корабы” спектаклен 10 декабрьдә Казан тамашачысы да карый алачак. Театр III Бөтенроссия яшь татар режиссурасы фестивалендә катнаша. 10ысы көнне кече сәхнәдә “Тормыш корабы”, 11-декабрьдә көндез зур сәхнәдә Карло Гоцциның “Болан-Патша” спектакльләре булачак.

Режиссер Гүзәл Акбердина: “Әмирхан Еники иҗаты рухы белән миңа бик якын. Аның әсәрләрендә тискәре яки уңай геройлар юк, ул кешеләрнең эчке дөньясын бик җентекләп тасвирлавые белән кызыклы. Тормышның чын йөзен бизәмичә һәм кешеләрнең катлаулы язмышын шомартмыйча кыю сурәтләве, хиссияткә бирелмичә, тыелыбрак тыгыз язуы белән Чеховны хәтерләтә. Мин аны дөньякүләм зур әдип дип саныйм.”

1

2

3

4