“Гауптвахта, я сәхнә – берсен сайла”, – диде... (ВИДЕО)

ТНВ каналының “Татарлар” тапшыруында гаҗәеп шәхес, Габдулла Тукай исемендәге Татар дәүләт филармониясе солисты, композитор Гали Ильясов турында тапшыру чыкты. Әлеге тапшыру уникаль кадрларга, кызыклы истәлекләргә бай.

Тын Океанның диңгез авиациясе флотында хезмәт иткәндә, Гали Ильясов, җырчы буларак танылып, армия смотрларында катнаша, лауреат исеме ала. 1962-1965 елларда Мәскәү консерваториясе каршындагы музыка училищесында белем ала. Аны тәмамлагач, Г.Тукай исемендәге Татар дәүләт филармониясендә эшкә чакырыла.

Гали Ильясов филармониянең лекторий артистлары белән бергә илебезнең зур концерт залларында, Кавказ, Балтыйк буе республикаларында, Ерак Көнчыгышта, Сахалинда, Норильски һәм Якутски якларында, БАМда, Урта Азиядә чыгышлар ясый. Аның җырлары Монголия, Чехословакия, Венгрия илләрендә, Лондон, Лейпциг, Зальцбург, шәһәрләре сәхнәләрендә, Италиядә, Төньяк һәм Үзәк Африка җирләрендә кайнар алкышларга күмелә. Ул 1977 елда Туниста Карфаген фестивалендә, 1978 елда Татар дәүләт җыр һәм бию ансамбле белән Италиянең “Унита” гәзите бәйрәмендә катнаша.

1997 елда “Мәгариф” нәшриятендә аның “Оныттың бугай...” дигән 40 җырын берләштергән җыентыгы дөнья күрә. 2017 елда аның исемен мәңгеләштерү йөзеннән ул яшәгән йорт диварына мемориаль такта эленде.