Казанда «Тарих фест» дигән тарихи-мәдәни фестиваль узачак

Август башында Татарстан Республикасы Милли музееның җәйге сәхнәсендә «Тарих фест» дип аталган тарихи-мәдәни фестиваль була. Әлеге фестиваль – «Тарихи блогер» халыкара конкурсын да үз эченә алган зур проектының бер өлеше.

Милли музейның генераль директоры Айрат Фәйзрахманов әйтүенчә, чараның төп максаты – Татарстан һәм Идел буе халыкларының борынгы һәм урта гасырлар тарихын заманча һәм кызыклы форматта күрсәтү, туристик потенциалны ачу.

“Тарих фест”та күңел ачу һәм белем бирү чаралары булачак, тарихи реконструкцияләр күрсәтеләчәк һәм урта гасыр тарихына багышланган очрашулар, экскурсияләр, театральләштерелгән сәхнәләр булачак.

Шулай ук осталар ярминкәсе, күн, мех һәм башка материаллар белән эшләүче һөнәрчеләр мәйданчыгы эшләячәк.

Моннан тыш Милли музейга килүчеләр музей биналарының яшерен почмакларын күрә һәм аларның тарихы белән таныша алачак.

Программа кысаларында төбәкне өйрәнүчеләр Илнур Газизуллин һәм Илдар Шәфиков Казан бистәләрендә чәй эчү традицияләре һәм самоварның гаиләдәге урыны турында лекцияләр укыячак.