Авыл хуҗалыгы министрлыгында Кытай делегациясе белән берлектә авыл хуҗалыгы чималын эшкәртү мәсьәләләре буенча фикер алыштылар

Татарстан Республикасы Авыл хуҗалыгы һәм азык-төлек министрлыгында авыл хуҗалыгы һәм азык-төлек министрының беренче урынбасары Ленар Гарипов рәислегендә Кытай делегациясе белән эшлекле очрашу узды.

Кытай делегациясен SRON Рәисе Вэнь Пэн җитәкли. Аның составына шулай ук China Chengtong International Investment Стратегик үсеш департаменты директоры Фу Яньцзе, SRON коммерция директоры һәм Россия базарлары буенча директоры Цуй Ян һәм SRONның бөртеклеләр буенча инженер проектларының баш белгече Чжан Баодэ кергән.

SRON предприятиесе - коелучан материалларны саклау һәм транспортлау өчен комплекслы инженерлык чишелешләрен дөньякүләм тәэмин итүче.

Компания бөртекле культуралар сәнәгате, тауасты тармагы, төзелеш материаллары җитештерү һәм күмер сәнәгате кебек тармаклар өчен куркынычсыз, ышанычлы, технологик яктан алдынгы, түбән углеродлы һәм экологик чиста EPC-хезмәтләр (проектлау, сатып алу, төзелеш) күрсәтүдә махсуслашкан.

Ленар Гарипов Татарстан агросәнәгать комплексы мөмкинлекләрен тәкъдир итте. Ул, Татарстан Россиянең перспектив төбәкләренең берсе һәм тулаем авыл хуҗалыгы продукциясе күләме буенча 5нче урында тора, дип билгеләп үтте. Россия төбәкләре арасында республика башлангыч йомгаклар буенча түбәндәге урыннарны били: сөт җитештерү буенча – 1нче, бәрәңге җитештерү буенча – 2нче, йомырка, терлек һәм кош ите җитештерү буенча – 7нче, шикәр чөгендере җитештерү буенча – 8нче һәм ашлык җитештерү буенча – 9нчы.

Яклар үсемлекчелек, терлекчелек өлкәләрендә халыкара хезмәттәшлек перспективалары, шулай ук АПКны цифрлаштыру, аграр белем бирү, агросәнәгать продукциясен экспортлау һәм импортлау мәсьәләләре турында фикер алыштылар.

Ашлык, шикәр чөгендере, күн чималы эшкәртү, саклау һәм транспортлау, шулай ук мөгезле эре терлекләр өчен азык җитештерү мәсьәләләренә аерым игътибар бирелде.

Очрашу азагында Ленар Гарипов Кытай делегациясен 2026 елның ике мөһим чарасына: 17-20 август көннәрендә узачак «РОСТКИ: Россия һәм Кытай - үзара файдалы хезмәттәшлек» IV халыкара форумына һәм 19-20 август көннәрендә «Рус кыры - 2026» III Бөтенроссия селекционерлар һәм орлыкчылар форумына чакырды.

Яклар агросәнәгать комплексында сәүдә-икътисадый элемтәләрне ныгытуның мөһимлеген ассызыкладылар һәм «Экспорт» илкүләм проектына ярдәм итү буенча уртак хезмәттәшлек перспективаларын билгеләп үттеләр.