«Питрау түгәрәк уены» 500дән артык башкаручыны берләштерәчәк

Шимбә көнне Мамадыш районының Җөри авылында «Питрау» керәшен мәдәнияте бәйрәме узачак. Бирегә 50 меңнән артык кунак көтелә.

«Питрау» – традицияләрне, спортны һәм иҗатны берләштереп, республикадагы җәйге халык бәйрәмнәре чылбырын тәмамлаячак.

«Питрау» керәшен мәдәнияте бәйрәме Җөри авылы янындагы «Тырлау» аланында 28нче тапкыр үткәреләчәк. Ул иң күп кеше җыя торган этнокультур чараларның берсе.

«Питрау» – керәшеннәрнең иң борынгы һәм олыланган бәйрәмнәренең берсе. Аның тарихы тирән үткәнгә – җәйге кояш торгынлыгы чорына барып тоташа. Соңрак бәйрәм изге апостоллар Петр һәм Павелны искә алу көненә туры китерелеп, Петр уразасы тәмамлану һәм печән өсте башлану символына әверелгән.

Татарстан керәшеннәре иҗтимагый оешмасы җитәкчесе Людмила Белоусова әйтүенчә, бу бәйрәм традицион рәвештә очрашулар һәм танышулар вакыты булып саналган. «Элек-электән бу кәләшләр җыела торган, яшьләр шау-шу килеп күңел ачкан һәм танышкан түгәрәк уен булган. Моннан соң башка зур халык бәйрәмнәре булмаган. Бүген дә Питрау бөтен республикада авыл бәйрәмнәре чылбырын тәмамлый», – ди ул.  

Быел бәйрәмдә Татарстанның 20 районы һәм шәһәреннән, шулай ук Башкортстан, Удмуртия, Самара һәм Чиләбе өлкәләреннән 50 эстрада артисты һәм 50дән артык иҗат коллективы чыгыш ясаячак.

Төп вакыйга – халыклар бердәмлегенә багышланган масштаблы театральләштерелгән пролог булачак. Анда 300дән артык артист катнашачак.

Бәйрәмнең аерылгысыз өлеше – «Питрау түгәрәк уены» республика керәшен этник сәнгате фестивале торачак.

«Ел саен бәйрәм кысаларында „Питрау түгәрәк уены“ республика керәшен этник сәнгате фестивале уза. Быел Татарстан районнарыннан, шулай ук Башкортстан һәм Удмуртиядән 61 фольклор коллективы гариза тапшырды. Моннан тыш, ун солист чыгыш ясаячак. Барлыгы бу – 547 катнашучы. Катнашучылар саны узган еллардагыдан ким булмас, хәтта күбрәк тә булыр дип көтәбез», – дип хәбәр итте Людмила Белоусова.

Моннан тыш «Питрау»да «Керәшен чибәре» бәйгесенә нәтиҗә ясалачак. Конкурсының финалына ун кыз узган.

Татарстан керәшеннәре иҗтимагый оешмасының «Бәрәкәт» яшьләр бүлеге җитәкчесе Игорь Шрыков сүзләренчә, әлеге конкурс бәйрәм оешкан көннән башлап диярлек үткәрелә һәм бу вакыт эчендә 500гә якын кызны берләштергән.

«Беренче елларда конкурс башта авыл, аннары район дәрәҗәсендә уза иде. Соңрак ул республика статусын алды. Аның төп бурычы – яшьләр арасында керәшен мәдәниятен, гореф-гадәтләрен, җырларын һәм милли киемнәрен саклау һәм популярлаштыру», – диде ул.

Конкурсның финалы 18 июльдә, Җөри авылындагы бәйрәмнең аерым мәйданчыгында, фестивальне рәсми ачу тантанасыннан соң ук башланачак.

Моннан тыш, аерым рәвештә «Мамадыш керәшен чибәре» дә сайлап алыначак.

Татарстан керәшеннәре оешмасы җитәкчесе Людмила Белоусова әйтүенчә, әлеге конкурста җиңгән кыз керәшен мәдәниятенең үзенчәлекле илчесенә әверелә.

«Ел дәвамында ул республикада керәшен мәдәниятенең йөзе булып торачак. Җиңүче кыз рәсми чараларда катнашачак, кунакларны каршы алачак һәм озата барачак, фестивальләрне ачачак һәм ябачак, шулай ук төрле мәйданчыкларда керәшен мәдәниятен тәкъдим итәчәк», – диде Белоусова.