Татар китабы йортында «Безнең урам көе» концерты булачак

Әлеге кичә «Күрше. Мирас» мәдәни проектының тәүге чарасы. Июльдән сентябрьгә кадәр Шәриф Камалның мемориаль фатиры белән Татар әдәбияты тарихы музее Казанның иң борынгы урамнарының берсе булган Островский урамының тарихын өйрәнәчәк.

Проект Татар китабы йорты ишегалдындагы җырлы кичә белән башлана. Биредә теләге булган һәркем җыр башкара, шигырь укый яки Островский урамы белән бәйле истәлекләре һәм вакыйгалары белән уртаклаша ала. Аннан соң кунакларны матур концерт көтә.

Оештыручылар шәһәр халкын һәм кунакларын җәйге кичне ачык һавада үткәрергә, тере музыка тыңларга, күршеләре белән танышырга, урамга яңача күз салырга һәм шәһәр хәтерен саклауга юнәлгән зур проектның бер өлеше булырга чакыра.

«Күрше. Мирас» – урам һәм ишегалды фестивальләренең шәһәр мирасына багышланган яңа юнәлеше. Проект шәһәр тарихын кешеләр язмышы һәм конкрет урыннар аша өйрәнүне максат итеп куя.

Татар китабы йорты әлеге проект кысаларында тематик экскурсияләр, рәссамнар пленэры, урам күргәзмәсе, аудиогид тәкъдим итү, урамда яшәүчеләр һәм тарихчылар белән очрашулар, шулай ук таныш урамга ачык һавадагы тере музей буларак яңача карарга мөмкинлек бирәчәк башка чаралар уздыру планлаштырыла.

Проектның нигезендә архив документлары, гаилә фотолары, урамда яшәүчеләрнең истәлекләре һәм шәхси тарихлары ята. Нәкъ менә алардан урамның чын тарихы җыела. Әлеге эш нәтиҗәсендә һәркем өчен ачык булган цифрлы архив, яңа экскурсия маршруты, аудиогид һәм күргәзмә барлыкка киләчәк. Алар Островский урамы хәтерен сакларга һәм музейның даими программасының бер өлешенә әверелергә ярдәм итәчәк.