ЗӨҺРӘ СӘХӘБИЕВА: «СӘНГАТЬ - МИЛЛӘТНЕҢ КИЛӘЧӘГЕ»

Казанның С.Сәйдәшев исемендәге Зур концертлар залында 26 сентябрьдә яшь башкаручы вокалистларның Хәйдәр Бигичев исемендәге җыр конкурсы лауреатларының Гала-концерты булачак. Аларның исемнәре быел җәй көннәрендә мәгълүм булды. Татарстанның халык артисты Зөһрә Сәхәбиева-Бигичева әлеге фестивальне оештыручыларының берсе булып тора. Бүген без аның белән шушы бәйге турында сөйләшәбез.

- Зөһрә ханым, әлеге җыр конкурсы башкалардан үзенең максаты, нияте белән нык аерылып тора...

- Бәйгенең максаты - җыр, вокал һәм милләтнең торышын, аның киләчәген кайгырту. Чөнки югары планкага күтәрелгән моң, җыр, вокал сәнгате көннән-көн түбәнгә тәгәри. Ә бит сәнгатебезне югарыга күтәрү өчен ничә буын шагыйрьләр, композиторлар, җырчылар көч куйган. Бүгенге көндә җыр сәнгатенең көчсезләнүе җанны әрнетә. Бу минем генә фикерем түгел. Икъдисадыбызны күтәрү авыр түгел, ә менә мәдәниятебез артка тәгәрәсә - аны кире кайтарып булмаска да мөмкин, дигән фикер белән мин килешәм. Бу конкурсның үз йөзе, үз үзенчәлеге бар. Бу - милләтара фестиваль, монда татар яшьләре генә түгел, һәр милләт яшьләре дә катнаша ала. Конкурсның нигезләмәсе дә шактый катлаулы, Хәйдәр үзе нинди амплуада җырлый иде, конкурсантлар да шул югарылыктагы әсәрләр башкарырга тиеш.

- Конкурсантлар Хәйдәр Бигичев репертуарыннан әсәрләр башкарырга тиеш булгач, димәк, киләчәктә дә безнең сәхнәбездә чын ир-ат тавышлы җырчылар булачак әле...

- Сәнгатькә, җырга килүче яшьләребез җитди уйласыннар иде. Алар югары сәнгатькә, аның үсешенә хезмәт итәбез дип килсеннәр иде. Чөнки сәнгатьнең булуы, халкыбызның яшәве белән тыгыз бәйле. Яшьләр Хәйдәр исеме янына туплана, аның иҗатын өйрәнә. Хәттә аны күреп үсмәгән яшьләр дә, аңа охшарга тырыша. Чыннан да, Хәйдәр һәр яклап, яшьләргә үрнәк була торган шәхес. Югары сәнгать ягыннан да, әхлакый югарылыгы ягыннан да... Юкка гына президентыбыз: «Хәйдәр -  ул җырчы гына түгел, ул халкыбызның күңел йолдызы» димәгәндер. Конкурсыбыз М.Шәймиевның хәер-фатихасы белән гамәлгә ашырылды. Ә аның төп оештыручысы - Мәдәният министрылыгы. Изге Рамазан аенда изге эш башкарыла дип саныйм мин үзем.

- Бәйгедә, минем аңлавымча, профессиональ җырчы булырга әзерләнүче яшъләр генә катнаша. Җиңүчеләргә укуларында нинди дә булса өстенлекләр биреләчәкме?

- Конкурста җиңүчеләргә премияләр бирелә, шулай ук укуда һәм иҗатта уңышларга ирешкән консерватория, музыка училищелары студентларына махсус Х.Бигичев исемендәге  стипендияләр каралган. Әлеге премия дә Хәйдәрнең иҗатын мәңгеләштерү, милли башкару традицияләрен саклап, аны дәвам иттерү җәһәтеннән оештырыла.