ИлГәрәй: “Догаларыбызны укып, сәхнәгә чыктык...”

Җырчы ИлГәрәй берничә ел элек “Шәһри Казан”га биргән интервьюсында күз тиюгә ышану-ышанмавы турында сөйләгән. Журналистның: “Күз тигәнне, негатив энергияле кешеләрне тоя аласызмы?” – дигән соравына җавап биреп, ул бер очрак турында исенә төшергән.

– Бик көчле кеше булса, юк, тоеп булмый. Бер авылга килеп төштек. Клуб мөдире әйтә: “ИлГәрәй, бездә бик көчле апаң бар. Бездә күп җырчылар чыгыш ясады. Аңнарын югалткан җырчылар да булды. Аппаратуралары да янды”, – ди. Без төркем белән бергә утырдык та, белгән барлык догаларыбызны укып, сәхнәгә чыктык. Берне җырладым, икене... Өченчесендә хәл китә башлады. Нәрсә эшләргә дә белмим, җырның сүзләре онытыла. Дүртне җырладым да, кереп киттем. Киемнәрне алыштырдым, су эчтем, догаларны укыдым да, тагын сәхнәгә чыктым. Тагын бер-икене җырладым, тагын хәл китә. Көчкә ерып чыктык шулай. Бер кыйммәтле аппаратурабыз да янган иде шунда. Халык хәтта: “ИлГәрәй, энем, утларың өчен борчылма. Безгә килгән һәр кеше белән нәрсәдер була”, – дип запискалар язып, мине “тынычландырды” да әле.