|
|
Бүген кемнәр туган
|
|
Архив
|
24.11.2011 Спорт
Сафаҗайда өлкә чемпионатыҮткән якшәмбе көнне Сафаҗайда танылган спорт остасы, күп тапкыр Россия һәм Дөнья чемпионы, нижгар көрәшчеләренең исемен һәм данын бөтен дөньяга яңгыраткан Рамил Нуримановның кубогына көрәш ярышы узды. Ярышның абруе зур-ул билбаулар белән көрәш буенча өлкә чемпионаты дип санала. Турнирны, Россия флагын күтәреп тантаналы рәвештә ике дөнья чемпионы - Ханнән Мусин һәм Рамил Нуриманов ачтылар. Чемпионатка Түбән Новгород һәм Кыстау шәһәрләре, Рбишча, Татар Моклокасы һәм Бозлау, Яндавишча, Сафаҗай авыллары командалары килгән.
Көрәшчеләр 66, 73, 81, 90, 100 килограммга кадәр һәм абсолют авырлыкта көч сынаштылар. Алдан ук, әйтергә кирәк, судьялар Рамил Мусин, Ринат Сәбитов һәм Рафаэль Атауллин рәнҗү-үпкәләүгә, хәрәмгә урын калдырмады.
66 килограммга кадәр үлчәмдә Моклокадан: Илдар Исхаков, Азат Харясов, Илнар Зайцев, Яндавишчадан Илгизәр Махмутов, Бозлаудан Надир Хамзин, Сафаҗайдан Азат Алимов белән Ринат Вилданов катнаштылар. Беренче урынны Азат Алимов, икенче һәм өченче урыннарны Илнар Зайцев белән Надир Хамзин яулап, Спас районы командасы тренеры Азат Магҗановны сөендерделәр.
Магҗановның өмете 73 килограммга кадәрге үлчәмдә дә бар - Ринат Тяжелов. Тик бу категориядә Түбән Новгородтан тренер Рамил Юсипов җитәкләгән көрәшчеләр медальләрне үз итмәкчеләр. Шулай килеп чыкты да: Дамир Юсипов моклокалыны сыртка салды -Түбән Новгород - беренче. Шамил Адиатуллин үз командасында булган Ильяс Хәсәновны алдырып, өченче урында булды һәм медаль шәһәргә китте. Сафаҗайлылар, яшь егет Азат Алимовтан башка, пьедесталда юк диярлек. Әллә иртәрәкме? Иртәрәк булган. Авыр үлчәмдәгеләр келәмдә. 81 килограммга кадәр авырлыкта көрәштә Дамир Измайлов рбишчалы Ринат Худбеевны егып, соңыннан кыстаулы Динар Мустафинны өченче урыннан мәхрүм итт,.соңыннан "Ямьле көрәш" номинациясендә дә җиңүче булып чыкты. Сафаҗайлыларның тренеры Рөстәм Хәйретдиновның чыраеннан, шуның белән калмыйбыз дигәнен аңлап була иде. Турнирның ачышы - сафаҗайлы Илдар Мусин. "Җиңүгә омтылыш" бүләге дә анарда. Ул беренче урынга бара торган юлда Яндавишчадан Илдар Махмутовка, рбишчалы Рамис Хәйретдиновка, шәһәрдән Илшат Булатовка өмет калдырмады. Илшат - икенче. Рбишчалыларның әлегә хәтле бер медале дә юк.
90 килограммга кадәр үлчәмдә көрәш. Чүмбәлидән тренеры Зиннур Бага-утдинов белән икәүләп килгән Рамис Хәсәнов, Яндавишчадан Илнур Мусин, Рбишчадан Ринат Нәвретдинов һәм Фәнис Мөхетдинов белдергәннәр.
Финал Рбишчаныкы булып чыкты: Ринат - беренче, Фәнис икенче. Тренер Ханнән Мусинның ышанычы акланды, дисәңдә ярый. Яндавишча командасы тренеры Илдар Котдусовның көрәшчеләр обоймасы бушады, медальләр юк. 100 килограммга кадар авырлыкта Моклокадан Руслан Шакиров һәм сафаҗайлы Илшат Нуриманов көрәштеләр. Ике дәү егет көчләрен кызганмады. Нәтиҗәдә - Илшат беренче.
Зур авырлыкта көрәшчеләр абсолют чемпион исеме өчен көч куйдылар. Дөресрәк әйткәндә, Ринат Сәбитовны җиңәргә тырыштылар. Булып чыкмады. Тәҗрибә өстенлекне алды. Ринат беренче, Илшат Нуриманов икенче, Ринат Нәвретдинов өченче.
Фәрит АЙМАЛЕТДИНОВ |
Иң күп укылган
|