Балык Бистәсендә “Абага чәчәге” фильмы төшерелә башлады (ФОТО)

Фильм язучы Ркаил Зәйдулла повестлары нигезендә төшерелә. Сюжеты мондыйрак – Алия сөйгән ярын югалта, ә менә шуннан соң аның бәхеткә барыр юлы катлаулы, төрле-төрле, хәтта трагик сынаулар белән тулы булачак.

Традиция буенча, төшерү эшләре бөтен иҗади төркемнең култамгалары куелган тәлинкәне вату белән башланып китте. Тәлинкә кыйпылчыклары күбрәк булган саен, картина уңышлырак булачак дип санала. Һәр катнашучы үзенә тәлинкә кыйпылчыгы алды һәм сакларга вәгъдә бирде.

«Фильмның жанрын төгәл генә билгеләү кыен. Минемчә, безнең картина – ул үч алуның бернинди проблеманы да чишмәве, иң мөһиме гаделлек табу булуы турындагы фильм-притча», – ди картинаның режиссеры Салават Юзеев.

Төшерү эшләре Татарстанның Балык Бистәсе районында бара. Локацияләр өчен иң гүзәл урыннар сайланган.

«Абага чәчәге» фильмында төп рольләрнең берсен Татарстанның халык артисты, Әлмәт татар дәүләт драма театры артисты Рафик Таһиров уйный. Алия ролендә – Гөлнара Хасипова. Бу аның кинодагы беренче эше түгел, әмма мондый күпкырлы төп рольне ул беренче тапкыр башкарачак.

«Миңа үз каһарманым бик кызык. Безнең уртак якларыбыз күп: холыкларыбыз охшаш, хәтта кайбер сынауларны миңа да узарга туры килде. Мин кыенлыклар алдында баш имәгән,  аларны намус белән узу өчен үзендә ихтыяр көче тапкан кыз образын гәүдәләндерергә тиешмен», – дип хис-кичерешләре белән уртаклашты Гөлнара Хасипова.

«Бу тасманың сценарий нигезенә танылган язучы, Татарстанның Халык шагыйре, Тукай исемендәге Дәүләт премиясе лауреаты Ркаил Зәйдулла повестлары салынды. Әлеге әсәрләр җанлы хис-тойгыларга бай, аларда бүгенге көн каршылыклары, чын һәм ялган кыйммәтләр проблемасы күтәрелә», – ди Миләүшә Айтуганова.

Фильм татарча төшерелә. Продюсер Миләүшә Айтуганова сүзләренчә, тамашачылар даирәсен киңәйтү өчен русча дубляж ясау да планлаштырыла.

Картина өстендәге эш 2027 елда тәмамланыр һәм төрле кинофестивальләрдә катнашканнан соң, «Абага чәчәге» фильмы киң прокатка чыгар дип көтелә.