Яшел Үзәндә узган «Иван Купала» бәйрәменнән ФОТОрепортаж

Узган шимбәдә Яшел Үзән районында кояш торгынлыгына багышланган «Иван Купала» славян мәдәнияте бәйрәме узды. «Каенлык» паркында концерт программасы, халык уеннары, мастер-класслар һәм Купала йолалары гөрләде.

Бәйрәм кунакларын Татарстан Рәисе, республика парламенты һәм Хөкүмәте исеменнән Татарстан халыклары Ассамблеясе рәисе Фәрит Мөхәммәтшин котлады. «Иван Купала – җәйге кояш торгынлыгына багышланган һәм табигать көчләренең чәчәк атуын гәүдәләндерүче традицион славян бәйрәме. Бу көнне без халык мәдәниятенең чишмә башына кагылабыз һәм аның кыйммәтләрен яшьләргә тапшырабыз», – диде ул.

Бәйрәм кунакларын Яшел Үзән районы башлыгы Михаил Афанасьев та котлады. «Иван Купала – ул дуслык бәйрәме, безгә үз телләребезне, традицияләребезне, йолаларыбызны һәм җырларыбызны сакларга мөмкинлек бирүче бәйрәм. Традицион кыйммәтләрнең, гаилә һәм мәхәббәтнең яклаучылары булган изгеләр Петр белән Февронияне олылау көне », – дип мөрәҗәгать итте кунакларга Михаил Афанасьев.

Төп аланлыкта традицион әйлән-бәйлән уеннары, батырлар ярышы һәм славян уеннары узды. Бәйрәмнең иң мавыктыргыч өлеше – зур концерт программасы иде. Чара бәйрәм геройлары – Яромир һәм Марья катнашындагы «Колыбель легенд» дип аталган театрлаштырылган тамаша белән ачылды.

Концерт программасында Татарстанның фольклор коллективлары, Беларусиядән «Вязанка» музыка һәм бию ансамбле һәм Серб Республикасыннан «Бисери Пливе Езеро» этно-төркеме чыгыш ясады. Минск шәһәреннән килгән «Сябры» вокаль-инструменталь ансамбле бәйрәмнең төп кунагы булды.

Иң төп мәйданчыкларның берсе булып күл торды, анда бәйрәмгә килүчеләр традицион Купала йоласында – кыр үләннәреннән һәм чәчәкләрдән үрелгән таҗларны суга агызуда катнаша алдылар. Традиция буенча, мондый йола бизәлешенең су өстендә йөзүе бәхет һәм теләкләрнең чынга ашуын вәгъдә итүче яхшы билге булып санала.Бәйрәм чаралары кичкә кадәр дәвам итте һәм утлы шоу, күлгә таҗлар агызу һәм этнодискотека белән тәмамланды.