Татарстанның халык артисты Зөфәр Харисовка – 55 яшь!

25 ноябрь көнне кич 18 сәгать 30 минутта Кәрим Тинчурин исемендәге Татар дәүләт драма һәм комедия театры бинасында Татарстанның халык артисты Зөфәр Назыйм улы Харисовка 55 яшь тулу уңаеннан иҗат кичәсе була.

З.Н.Харисовның шушы күркәм юбилеена нисбәтле Тинчурин театры 19-21 ноябрь көннәрендә Нәбирә Гыйматдинова әсәре, Тәслимә Хәләф инсценировкасы буенча куелган “Бер тамчы ярату” спектакле белән аның тугын ягында - Татарстанның Мөслим районында гастрольләрдә булачак. Биредә ул төп роль – Габдрәхим ролен башкарачак.

  Зөфәр Харисов 1956 елда Татарстанның Мөслим районы Түбән Табын авылында дөньяга килә. Казан дәүләт мәдәният һәм сәнгать институтын тәмамлагач Әлмәт Татар дәүләт театрында артист булып эшли. 1981 елдан алып бүгенгәчә Кәрим Тинчурин исемендәге Татар дәүләт драма һәм комедия театрында иҗат итә. Ул барлык образларының да үзенчәлекле сыйфатларын табып аларны көчле темперамент белән башкару сәләтенә ия. Ихлас уены белән тамашачыларның мәхәббәтен яулап, аларны яшь аралаш көләргә, елмаерга, уйланырга мәҗбүр итә.

Зөфәр Харисовның тынгысыз хезмәте Хөкүмәт тарафыннан югары бәяләнде. Театр өлкәсендәге казаныәлары өчен аңа “Татарстан Республикасының халык артисты” дигән мактаулы исем бирелде.

  Төп рольләре – Өмет – И.Юзеев «Гашыйклар тавы», Рәшит – К.Тинчурин «Назлы кияү», Ямгырчы би – Н.Фәттах «Итил суы ака торур», Пурсоньяк – Мольер «Галиҗәнап де Пурсоньяк», Сабир – И.Мәхмүтова «Син бит минем бергенәм...», Бикбулатов – И.Юзеев «Сандугачлар килгән безгә», Миннәт – М.Гыйләҗев «Бала баласы балдан татлы» ), Исхак (“Ай булмаса, йолдыз бар” Т.Миңнуллин), Габдрәхим (“Бер тамчы ярату” Н.Гыйматдинова) һ.б.

  Кичәдә Татарстанның халык артисты Резедә Төхвәтуллина, Татарстанның атказанган артисты Резедә Шәрәфиева, Илназ Минвәлиев, Алсу Хәбибуллина, артистның дуслары, хезмәттәшләре катнашыр дип көтелә.