Татарстанда “Спорт җире” марафонының төбәк этабында җиңүчеләр ачыкланды

Татарстан Республикасының Саба муниципаль районында «Спорт җире» бөтенроссия марафонының төбәк этабы узды. Масштаблы спорт чарасы "Олимп" стадионында үткәрелде.

Анда республиканың 24 муниципаль районыннан зона ярышларында сайлап алынган иң яхшы спортчылар һәм командалар җыелган иде.

Тантаналы ачылышта Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров, Саба муниципаль районы башлыгы Рәис Миңнеханов, Казан дәүләт аграр университеты ректоры Илшат Нуриев, Татарстан Республикасы Аграр яшьләр берләшмәсе рәисе Миләүшә Заһидуллина, шулай ук махсус кунак - авыратлет һәм пауэрлифтинг буенча спорт мастеры Руслан Пустовой катнашты.

Марат Җаббаров, марафон Россия Федерациясе Авыл хуҗалыгы министрлыгы инициативасы белән «Авыл территорияләрен комплекслы үстерү» дәүләт программасы кысаларында гамәлгә ашырыла, дип билгеләп үтте.

"Программаның максаты - инфраструктураны үстерү генә түгел, ә иң мөһиме - авылда кешеләрнең тормыш сыйфатын яхшырту. Һәм спорт, һичшиксез, монда зур роль уйный. Без аның бүген ничек буыннарны берләштерүен, төрле һөнәр һәм шөгыль ияләрен бер-берсенә якынайтуын күрәбез", - диде Марат Җәббаров.

Төбәк этабы программасына ГТО нормаларын тапшыру, көч экстримы, волейбол һәм мини-футбол турнирлары, гаилә стартлары, балалар йөгерешләре, шулай ук мастер-класслар һәм бай мәдәни программа кертелгән иде.

14 яшькә кадәрге кыз-бала булган гаиләләр эстафетасында Саба районыннан Мөбәрәковлар гаиләсе җиңү яулады. Шул ук номинациядә Балтач районыннан Нургалиевлар гаиләсе - 2нче урынны, ә 3нче урынны Нурлат районыннан Хәсәнҗановлар гаиләсе алды.

14 яшькә кадәрге ир-бала булган гаиләләр эстафетасы нәтиҗәләре түбәндәгечә: 1нче урында - Шикирҗановлар гаиләсе (Саба районы), 2нче урында - Сафиевлар гаиләсе (Буа районы), Саба районыннан Мәүлетовлар гаиләсе 3нче урынга булды.

Пляж футболы буенча Саба районыннан "Саба яшьләре" командасы җиңү яулады, икенче урынны шулай ук Саба районыннан «Кәеф бар» командасы алды, өченче урынны Теләче районы командасы алды.

ГТОның көч ярышларында ир-атлар арасында Саба районы егетләре иң көчлеләр булып танылды. Алардан иң көчлесе - Олугбәк Вайисов, икенче урында - Булат Мәүлетов, өченче урында - Илшат Заганшин.

Хатын-кызлар арасында ГТО ярышларында алтын медальне Саба районыннан Альбина Хафизова алды, шулай ук Саба районыннан Фәридә Рәхимова - икенче урында, бронза Кукмара районыннан Мәрьям Гайнетдиновага бирелде.

Аркан тартышу буенча иң көчлесе Азнакай районы командасы булды. Икенче урында - Саба районы, өченче урында - Мөслим районы командасы.

Көч экстримы буенча ир-атлар арасында Сабадан Фуат Фәләхов иң көчлесе булды, икенче урынны Арча районыннан Әнис Гарипов алды, өченче урын Казан дәүләт аграр университеты студенты Максим Лёсинга бирелде.

Хатын-кызлар арасында беренче урынны Фәридә Рәхимова (Саба районы) алды, икенче урынны Регина Сәфәргалиева (Биектау районы) алды, бронзаны Казан шәһәреннән Лея Хәбибуллина алды.

Төбәк этабында җиңүчеләр Татарстан Республикасын «Спорт җире» бөтенроссия марафоны финалында күрсәтәчәкләр, ул сентябрьдә узачак.

Мондый чараларны уздыру массакүләм спортны үстерүгә һәм актив тормыш рәвешен популярлаштыруга юнәлдерелгән «Россия спорты» дәүләт программасы бурычларына туры килә.