“Алтын минбәр” кинофестиваленең конкурс программасы игълан ителде

XXII Казан халыкара “Алтын Минбәр” кинофестиваленең шорт-листы билгеле булды. Сентябрьдә Татарстан башкаласында узачак форумның конкурс программасына быел 54 фильм кергән.

Оештыручылар әйтүенчә, XXII "Алтын Минбәр" фестиваленә барлыгы 66 илдән 1030 гариза килгән булган. “Алтын Минбәр” фестивале тарихында беренче тапкыр Венесуэла, Брунея Солтанлыгы һәм Тогодан картиналар тәкъдим ителгән.

Сайлап алу комиссиясенең эше нәтиҗәләре буенча конкурс программасы формалаштырылган – бәйгегә 21 илдән 54 фильм кергән. Алар: Россия, Малайзия, Шри-Ланка, Кыргызстан, Үзбәкстан, Иран, Төркия, Египет, Таҗикстан, Испания, Сирия, Индия, Ирак, Берләшкән Гараб Әмирлекләре, Того, Әзербайҗан, Тунис, АКШ, Алжир, Марокко, Казахстан фильмнары. “Тулы метражлы нәфис фильмнар”, “Кыска метражлы нәфис фильмнар”, “Документаль фильмнар”, “Анимацион фильмнар” номинацияләренең һәркайсына 10шар картина тәкъдим ителгән.  Ә Татарстан җитештергән һәм Татарстан турындагы киноларны үз эченә алган Милли конкурс программасына 14 картина кертелгән.

Традиция буенча, форумның конкурс программасына комиссия тарафыннан сайлап алынган, гомумкешелек рухи-әхлакый кыйммәтләрен һәм мәдәни традицияләрен чагылдырган, тынычлык урнаштыру, дини түземлек һәм гуманизм идеяләрен йөртүче Россия һәм чит ил картиналары кертелә.